რუსეთში, ვლადიკავკაზიდან ადლერის მიმართულებით მოძრავ მატარებელში პატიმარი ფედერალური სასჯელაღსრულების სამსახურის თანამშრომლებს თავს დაესხა. თავდასხმის შედეგად ერთი თანამშრომელი დაიღუპა, სამი კი დაშავდა. ინფორმაციას რუსული სახელმწიფო მედია ავრცელებს.
გავრცელებული ცნობით, თავდასხმის დროს პატიმარმა ერთ-ერთი თანამშრომლის ცეცხლსასროლი იარაღი ჩაიგდო ხელში და რამდენჯერმე გაისროლა.
რუსი სამართალდამცავების განცხადებით, ამის შემდეგ პატიმარმა გაქცევა სცადა, რა დროსაც ის სამართალდამცავებმა მოკლეს.
რუსული სახელმწიფო მედია, სამართალდამცავ უწყებებზე დაყრდნობით, წერს, რომ თავდამსხმელი დმიტრი პუშკარევი იყო, რომელიც მანამდე საქართველოდან რუსეთში იყო ექსტრადირებული.
გავრცელებული ინფორმაციით, პუშკარევის ექსტრადირება ნარკოტიკებთან დაკავშირებული დანაშაულებისა და დანაშაულებრივი ორგანიზაციის შექმნის ბრალდებებით სისხლისსამართლებრივი დევნის მიზნით განხორციელდა.
