კონრად ადენაუერის ფონდი (KAS) თბილისში ოფისს ხურავს. ორგანიზაციის განცხადებით, გადაწყვეტილება საქართველოს მთავრობის მიერ შექმნილი პოლიტიკური და სამართლებრივი ჩარჩოს პირდაპირი შედეგია, რომლის პირობებშიც ფონდი ქვეყანაში თავისი ძირითადი მისიის შესრულებას ვეღარ ახერხებს.
ფონდის ინფორმაციით, 28 ივლისს საქართველოს მთავრობამ არ დააკმაყოფილა KAS-ის განაცხადები პროექტების დაფინანსების შესახებ, რომლებიც ახალი „გრანტების შესახებ“ კანონის შესაბამისად იყო წარდგენილი.
ორგანიზაციის განცხადებით, საქმიანობის გასაგრძელებლად ინტენსიური ძალისხმევა განხორციელდა, მათ შორის გერმანიის ფედერალური მთავრობის მხრიდანაც, თუმცა ახალი სამართლებრივი ჩარჩოს ფარგლებში მუშაობის გაგრძელების უზრუნველყოფა ვერ მოხერხდა.
„პროექტების დამტკიცება შესაძლებელი მხოლოდ იმ შემთხვევაში ჩანდა, თუ ისინი აღარ შეესაბამებოდა ფონდის პოლიტიკურ ხასიათსა და მის მისიას. საქართველოში მხოლოდ ყოფნა, ჩვენი უშუალო მისიის შესრულების შესაძლებლობის გარეშე, კონრად ადენაუერის ფონდისთვის მისაღები ალტერნატივა არ არის. შესაბამისად, ოფისის დახურვა წარმოადგენს გარდაუვალ შედეგს, რომელიც განპირობებულია საქართველოს მთავრობის მიერ ჩვენი საქმიანობის შეზღუდვით“, – აღნიშნულია განცხადებაში.
კონრად ადენაუერის ფონდი აცხადებს, რომ საქართველოსა და ქვეყანაში თავის მრავალწლიან პარტნიორებთან თანამშრომლობის ერთგული რჩება.
„ის ქვეყანაში იურიდიულ პირად რეგისტრაციას ინარჩუნებს, რათა პოლიტიკური გარემოებების შეცვლის შემთხვევაში დაბრუნების შესაძლებლობა ჰქონდეს“, – ნათქვამია KAS-ის განცხადებაში.
