ფავლენიშვილმა დღეს გამართულ ბრიფინგზე განაცხადა, რომ აქციის მიზანი მიხეილ სააკაშვილის გათავისუფლების მოთხოვნაა. მან შსს-ს მითითება უკანონოდ შეაფასა და აღნიშნა, რომ მოქალაქეებს საჯარო სივრცეში შეკრების უფლება არ უნდა შეეზღუდოთ.
„გუშინ შსს-სგან მივიღეთ ინფორმაცია, რომ თურმე არ შეიძლება 1-ელ ოქტომბერს, მიხეილ სააკაშვილის დატყვევებიდან ხუთი წლის თავზე, აქცია ჩატარდეს მიხეილ სააკაშვილის თავისუფლების მოთხოვნით. თურმე რიყის პარკში აქციის ჩატარება არ შეუძლიათ საქართველოს მოქალაქეებს, თუ ამის ნება არ ექნება შსს-სა და მერიას.
ეს მითითება, რა თქმა უნდა, აბსოლუტურად უკანონო გახლავთ. შეუძლებელია, რომ საჯარო სივრცეებში, თუნდაც პარკებსა და სკვერებში, გადაადგილების უფლება ეზღუდებოდეთ ადამიანებს“, - განაცხადა ფავლენიშვილმა.
მისი შეფასებით, ხელისუფლების გადაწყვეტილება „ნაციონალური მოძრაობისა“ და მიხეილ სააკაშვილის მიმართ შიშით არის განპირობებული.
„კარგად იციან, რომ აღმშენებლობის ცხრაწლიანი პერიოდი აუცილებლად გაგრძელდება ამ ქვეყანაში და შეწყდება ნგრევის 14 წელი. კარგად იციან ის როლი, რომელსაც ითამაშებს მიხეილ სააკაშვილი „ნაციონალურ მოძრაობასა“ და ქართველ ხალხთან ერთად ამ რეჟიმის დემონტაჟის საქმეში“, - აღნიშნა მან.
ფავლენიშვილმა მხარდამჭერებს მოუწოდა, შესაძლო დაბრკოლებების მიუხედავად, აქციაზე მივიდნენ.
„რაც არ უნდა ტექნიკური დაბრკოლება შეგვიქმნან, აუცილებლად მივალთ რიყის დოქებთან, რომელიც იქცა საქართველოს გაპარტახებისა და გაძარცვის სიმბოლოდ. აუცილებლად შევიკრიბებით 1-ელ ოქტომბერს, 17:00 საათზე“, - განაცხადა ირაკლი ფავლენიშვილმა.
აქცია 1-ელ ოქტომბერს, 17:00 საათზე, რიყის პარკში, ე.წ. დოქებთან არის დაგეგმილი.
