„ერთიანი ნაციონალური მოძრაობის“ ერთ-ერთი ლიდერი პეტრე ცისკარიშვილი 1-ელ ოქტომბერს, 17:00 საათზე, რიყის პარკის ამფითეატრში საპროტესტო შეკრებას აანონსებს. მისი განცხადებით, აქციის მონაწილეები მიხეილ სააკაშვილის გათავისუფლებას მოითხოვენ და „ქართული ოცნების“ მმართველობის 14 წელს გააპროტესტებენ.
ცისკარიშვილის თქმით, შეკრებას შეუერთდებიან როგორც თბილისის მცხოვრებლები, ისე რეგიონებიდან ჩამოსული მხარდამჭერები.
„ამ ნგრევის 14 წლისთავის გასაპროტესტებლად უნდა შევიკრიბოთ რიყის პარკში, იქვე არსებულ ამფითეატრში, პირველ ოქტომბერს, 17:00 საათზე. მოვითხოვოთ მიხეილ სააკაშვილის თავისუფლება და საინტერესო შეკრება გავმართოთ. ბევრი ადამიანი გამოვა სიტყვით, ბევრი ჩვენი მეგობარი და მხარდამჭერი მოვა თბილისიდან, ასევე ჩამოვლენ რეგიონებიდანაც“, - განაცხადა ცისკარიშვილმა.
მან ასევე გააკრიტიკა მიხეილ სააკაშვილის წინააღმდეგ მიმდინარე სასამართლო პროცესი, რომელიც 2007 წლის 7 ნოემბრის მოვლენებს უკავშირდება. ცისკარიშვილის შეფასებით, პროცესი აბსურდულია, რადგან მაშინდელმა პრეზიდენტმა მომხდარზე პოლიტიკური პასუხისმგებლობა აიღო, თანამდებობა დატოვა და ვადამდელი საპრეზიდენტო არჩევნები ჩატარდა.
„19 წელია გასული იმ პერიოდიდან. ეს ეგრეთ წოდებული სასამართლო ზის აქ და სერიოზული სახეებით მსჯელობენ და განიხილავენ იმ პერიოდის მოვლენებს. კიდევ უფრო მეტად უნდათ, რომ ის აბსურდული ბრალი, რაც სააკაშვილს უკვე წარდგენილი აქვს, კიდევ უფრო დამძიმდეს ამ აბსურდული 7 ნოემბრის სასამართლო მოსმენებიდან გამომდინარე“, - აღნიშნა მან.
ცისკარიშვილმა რიყის პარკში მდებარე ე.წ. დოქების შენობის დემონტაჟზეც ისაუბრა და ის „ქართული ოცნების“ მმართველობის შედეგად მიყენებული ზიანის სიმბოლოდ შეაფასა.
„არ შეიძლება ამდენი ხანი მოთმენა! სიმბოლურად, თვითონ ეს რიყის დოქების შენობა, რომელიც იყო ერთ-ერთი უპრინციპულესი და ულამაზესი ამ ქალაქში, ინგრევა და „ქოცების“ ხელით იშლება.
ამის ნახვა ალბათ ბევრისთვის საინტერესო იქნება, ვისაც არ ჰქონდა შესაძლებლობა, რომ იმ ადგილებში გაევლო და საკუთარი თვალით ენახა, თუ როგორ სპობს ამ არქიტექტურულ მემკვიდრეობას „ქოცების“ რეჟიმი“, - განაცხადა ცისკარიშვილმა.
მისი თქმით, აქცია 1-ელ ოქტომბერს, ხუთშაბათს, 17:00 საათზე გაიმართება.
