საქართველოს ეროვნული საფეხბურთო ნაკრების ყოფილი მთავარი მწვრთნელი ვილი სანიოლი საქართველოსა და ქართველ გულშემატკივრებს ემოციური წერილით ემშვიდობება. ფრანგი სპეციალისტი მადლობას უხდის ქვეყანას, ფეხბურთის ფედერაციასა და მოთამაშეებს და აცხადებს, რომ საქართველოს მის გულში მუდამ განსაკუთრებული ადგილი ექნება.
„ძვირფასო საქართველო,
გავიდა ექვსი დაუვიწყარი წელი, სავსე ემოციებით, განსაკუთრებული მომენტებითა და უნიკალური გამოცდილებით, რომლებსაც მთელი ცხოვრება გულში ვატარებ.
მადლობას ვუხდი ამ ქვეყანას ყველაფრისთვის, რაც მან ჩემთვის გააკეთა.
განსაკუთრებული მადლობა მინდა გადავუხადო ფეხბურთის ფედერაციას და ჩემს მოთამაშეებს. თქვენ მომეცით შესაძლებლობა, განმეცადა ისეთი ემოციები, რომლებიც მანამდე არასდროს მიგრძნია, და ისეთი მომენტები, რომლებსაც ვერასოდეს დავივიწყებ.
თუმცა ყველაზე ლამაზ ისტორიასაც კი ოდესღაც აქვს დასასრული. ახლა კი ჩემთვის დამშვიდობების დრო დადგა, პატივისცემით, მადლიერებითა და ღირსებით.
აქ მხოლოდ კოლეგებსა და თანამოაზრეებს არ ვტოვებ. აქ ვტოვებ ადამიანებს, რომლებთანაც წლების განმავლობაში ნამდვილი, ღრმა მეგობრობა ჩამომიყალიბდა. მეგობრობა, რომელიც, დარწმუნებული ვარ, კიდევ მრავალი ათწლეულის განმავლობაში დაგვაკავშირებს.
საქართველოს ჩემს გულში მუდამ განსაკუთრებული ადგილი ექნება.
მთელი გულით გისურვებთ ნათელ მომავალს, რადგან თქვენ ამას ყველაზე მეტად იმსახურებთ.
მადლობა ამ ექვსი არაჩვეულებრივი წლისთვის.
ნახვამდის და დარწმუნებული ვარ, ძალიან მალე ისევ შევხვდებით.
ვილი“, - წერს სანიოლი.
ვილი სანიოლი საქართველოს ნაკრებს 2021 წლის თებერვლიდან ხელმძღვანელობდა. მისი ხელმძღვანელობით ეროვნულმა გუნდმა 2024 წელს პირველად იასპარეზა ევროპის ჩემპიონატზე, ჯგუფური ეტაპი დაძლია და მერვედფინალში გავიდა.
საქართველოს ფეხბურთის ფედერაციის გადაწყვეტილებით, ეროვნულ ნაკრებს 2028 წლის ბოლომდე რამაზ სვანაძე უხელმძღვანელებს.
