საქართველოს პროკურატურამ უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში დახმარების ფაქტზე საქართველოს ორ მოქალაქეს ბრალდება წარუდგინა.
პროკურატურის ინფორმაციით, სახელმწიფო უსაფრთხოების სამსახურის კონტრტერორისტული ცენტრის მიერ ჩატარებული გამოძიების შედეგად დადგინდა, რომ ბრალდებულები ტერორისტულ ორგანიზაცია „ისლამურ სახელმწიფოში“ გაერთიანდნენ, მისი ლიდერის წინაშე ერთგულების ფიცი დადეს და ტერორისტული საქმიანობის დახმარების მიზნით ნებისმიერი დავალების შესასრულებლად მზადყოფნა გამოთქვეს.
უწყების ცნობით, ერთ-ერთი ბრალდებულის საცხოვრებელი სახლის ჩხრეკისას სამართალდამცველებმა საბრძოლო მასალა, ხელყუმბარა და ტერორისტული ორგანიზაციის სიმბოლიკის მქონე ნივთები ამოიღეს.
გამოძიება სისხლის სამართლის კოდექსის 328-ე მუხლით, უცხო ქვეყნის ტერორისტულ ორგანიზაციაში გაერთიანება და ტერორისტულ საქმიანობაში მისი დახმარება, ასევე 236-ე მუხლის მე-3 ნაწილით, საბრძოლო მასალისა და ასაფეთქებელი მოწყობილობის მართლსაწინააღმდეგო შეძენა-შენახვა, მიმდინარეობს. აღნიშნული დანაშაულები 17 წლამდე თავისუფლების აღკვეთას ითვალისწინებს.
პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.
