ევროკავშირის ოფიციალურმა პირებმა უკრაინას განუცხადეს, რომ დამატებითი ფინანსური დახმარების გამოყოფამდე სურთ დაინახონ პროგრესი საკანონმდებლო რეფორმებში, რომლებიც ჩრდილოვანი ეკონომიკის შემცირებას, საგადასახადო შემოსავლების ზრდასა და უკრაინის კანონმდებლობის ევროკავშირის სამართლებრივ ნორმებთან დაახლოებას ემსახურება. ამის შესახებ Bloomberg ინფორმირებულ წყაროზე დაყრდნობით იუწყება.
გამოცემის ცნობით, ნიუ-იორკში, გაეროს გენერალური ასამბლეის ფარგლებში, ევროკომისიის პრეზიდენტ ურსულა ფონ დერ ლაიენსა და უკრაინის პრეზიდენტ ვოლოდიმირ ზელენსკის შორის დაძაბული შეხვედრა გაიმართა. მხარეებმა უკრაინისთვის შემდგომი ფინანსური და თავდაცვითი მხარდაჭერის საკითხები განიხილეს.
Bloomberg-ის წყაროს ინფორმაციით, უკრაინულმა მხარემ შეშფოთება გამოთქვა ზამთარში რუსეთის მხრიდან თავდასხმების შესაძლო გაძლიერების გამო. უკრაინის წარმომადგენლებმა ყურადღება გაამახვილეს საჰაერო თავდაცვის შეზღუდულ შესაძლებლობებზე, რაც ქალაქების დაცვას ართულებს. გამოცემის ცნობით, მათ უკმაყოფილება გამოთქვეს ევროკავშირის გადაწყვეტილების გამოც, რომლის თანახმადაც, სანქციების გახანგრძლივების შესახებ შეთანხმების ფარგლებში, ორი რუსი ოლიგარქის წინააღმდეგ შეზღუდვები მოიხსნა.
შეხვედრის შემდეგ ურსულა ფონ დერ ლაიენმა სოციალურ ქსელ X-ზე დაწერა, რომ ევროპა უკრაინის თავდაცვის გასაძლიერებლად ძალისხმევას ზრდის. მისი განცხადებით, ევროკავშირისა და უკრაინის ახალი ანტიბალისტიკური პროგრამა თავდაცვითი წარმოების სწრაფ გაფართოებას შეუწყობს ხელს.
„ძვირფასო ვოლოდიმირ ზელენსკი, ევროპა უკრაინის თავდაცვის გასაძლიერებლად იმაზე მეტად მუშაობს, ვიდრე ოდესმე. ჩვენი ახალი ევროკავშირი-უკრაინის ანტიბალისტიკური პროგრამა წარმოების სწრაფად გაზრდაში დაგეხმარებათ. თავდაცვის სფეროში მხარდაჭერა კიდევ უფრო გაიზრდება. ასევე, რადაში რეფორმების წინსვლასთან ერთად, გაიზრდება საბიუჯეტო მხარდაჭერაც. მიმდინარე კალენდარულ წელს ჩვენ ჯერ კიდევ გვაქვს ხელმისაწვდომი 37 მილიარდი ევრო“, - წერს ევროკომისიის პრეზიდენტი.
ფონ დერ ლაიენის განცხადებით, ნიუ-იორკში გამართულ შეხვედრებზე მსოფლიო ლიდერებს უკრაინის თავდაცვის მხარდაჭერის გაზრდისკენ მოუწოდებს.
„ნიუ-იორკში თითოეული ლიდერისადმი ჩემი გზავნილი მკაფიოა: ყველამ უნდა გავაძლიეროთ უკრაინის თავდაცვის მხარდაჭერა“, - აღნიშნა მან.
