ევროკომისია მალე წარადგენს სამოქმედო გეგმებს ევროკავშირის წევრობის იმ კანდიდატი ქვეყნებისთვის, რომლებმაც გაწევრიანების გზაზე ყველაზე მეტ პროგრესს მიაღწიეს. ამის შესახებ ევროკომისიის პრეზიდენტმა ურსულა ფონ დერ ლაიენმა ევროპარლამენტში სიტყვით გამოსვლისას განაცხადა.
ფონ დერ ლაიენის თქმით, ევროკავშირის გაფართოების იდეა კვლავ აქტუალურია, რასაც უკრაინის, მოლდოვისა და დასავლეთ ბალკანეთის ქვეყნების ევროპული მისწრაფებები ადასტურებს.
„საკმარისია ყველა იმ ქვეყანას შევხედოთ, რომლებიც ჩვენს კავშირთან ახლოს არიან და რადგან მათი მომავალი ჩვენს კავშირშია, ჩვენ მალე წარვადგენთ სამოქმედო გეგმებს იმ კანდიდატი ქვეყნებისთვის, რომლებმაც ყველაზე მეტ პროგრესს მიაღწიეს“, — განაცხადა ევროკომისიის პრეზიდენტმა.
ამასთან, ფონ დერ ლაიენმა ხაზი გაუსვა, რომ ევროკავშირში გაწევრიანების პროცესი კვლავ თითოეული ქვეყნის მიერ მიღწეულ შედეგებზე იქნება დამოკიდებული.
„ეს პროცესი კვლავ დამსახურებაზე დაფუძნებული იქნება. ასევე, ვიმეორებ: ჩვენი ღირებულებების პატივისცემა განხილვას არ ექვემდებარება“, — აღნიშნა მან.
ევროკავშირის ოფიციალური მიდგომით, გაფართოების პროცესი კანდიდატი ქვეყნების მიერ რეფორმებისა და წევრობის კრიტერიუმების შესრულებაზეა დამოკიდებული და თითოეული ქვეყანა საკუთარი პროგრესის მიხედვით ფასდება
