საქართველოს პრემიერ-მინისტრმა ირაკლი კობახიძემ კულტურის მინისტრის თანამდებობაზე მაია ბითაძე წარადგინა.
ბითაძე ამ დრომდე საქართველოს პარლამენტის წევრი და გარემოს დაცვისა და ბუნებრივი რესურსების კომიტეტის თავმჯდომარე იყო.
„ქალბატონ მაიას აქვს მართვის განსაკუთრებული გამოცდილება. მრავალი წლის მანძილზე ის იკავებდა სხვადასხვა მაღალ თანამდებობას, მათ შორის იყო გარემოს დაცვის მინისტრის მოადგილე და თბილისის მერის მოადგილე, გარკვეული პერიოდის განმავლობაში კი კულტურის მიმართულებასაც კურირებდა“, — განაცხადა კობახიძემ.
პრემიერის თქმით, ბითაძე სამართლის დოქტორი და თბილისის სახელმწიფო უნივერსიტეტის ასოცირებული პროფესორია. კობახიძემ მისი დანიშვნის ერთ-ერთ მთავარ კრიტერიუმად „კეთილსინდისიერება“ დაასახელა და განაცხადა, რომ დარწმუნებულია, ბითაძე „ძალიან წარმატებული კულტურის მინისტრი იქნება“.
კულტურის მინისტრის თანამდებობა 28 ივლისიდან ვაკანტური იყო. ყოფილმა მინისტრმა თინათინ რუხაძემ პოსტის დატოვების მიზეზად ჯანმრთელობის მდგომარეობა დაასახელა.
