„თანაინვესტირების ფონდის“ ყოფილმა ხელმძღვანელმა გიორგი ბაჩიაშვილმა მაიამიში, ჰიბისკუსის კუნძულზე მდებარე ახლად აშენებული ვილა 51.5 მილიონ დოლარად გაყიდა. ინფორმაციას New York Post ავრცელებს.
გამოცემის ცნობით, უძრავი ქონება გასაყიდად აგვისტოს შუა რიცხვებში, 55 მილიონ დოლარად გამოიტანეს, თუმცა განცხადების გამოქვეყნებიდან მხოლოდ 11 დღეში უცნობმა მყიდველმა ის 51.5 მილიონ დოლარად შეიძინა. New York Post-ის თანახმად, ეს ჰიბისკუსის კუნძულზე უძრავი ქონების გაყიდვის რეკორდული ფასია.
გამოცემა წერს, რომ ბაჩიაშვილმა აღნიშნული ქონება 2021 წელს 19 მილიონ დოლარად შეიძინა. იმ დროისთვის ვილა დაუსრულებელი და მშენებლობის პროცესში იყო.
ბაჩიაშვილის ადვოკატმა პიტერ ჯ. სალასმა New York Post-ს განუცხადა, რომ მისი კლიენტის ამჟამინდელი ადგილსამყოფელი საიდუმლოდ რჩება.
გიორგი ბაჩიაშვილი 2026 წლის 18 თებერვალს პატიმრობიდან გათავისუფლდა. საქართველოს პროკურატურის განცხადებით, მან მის წინააღმდეგ წარმოებულ სისხლის სამართლის საქმეებზე დანაშაული აღიარა, ზიანი აანაზღაურა და მასთან საპროცესო შეთანხმება გაფორმდა.
ბაჩიაშვილი სახელმწიფო უსაფრთხოების სამსახურმა 2025 წლის მაისში დააკავა. მანამდე მას ბიძინა ივანიშვილის კუთვნილი კრიპტოვალუტის მითვისების საქმეზე 11 წლით, ხოლო სახელმწიფო საზღვრის უკანონოდ გადაკვეთის საქმეზე 4 წლითა და 6 თვით თავისუფლების აღკვეთა ჰქონდა მისჯილი. მის წინააღმდეგ ასევე მიმდინარეობდა საქმე „მტკვარი ჰესთან“ დაკავშირებით.
