საქართველოს პროკურატურის განცხადებით, ლაზარე ჯორბენაძის გარდაცვალების საქმეზე ჩატარებული საგამოძიებო და საპროცესო მოქმედებების შედეგად, ამ ეტაპზე „უტყუარად დადასტურებულია თვითმკვლელობის ფაქტი“.
უწყების ინფორმაციით, გამოძიება შინაგან საქმეთა სამინისტროში 2026 წლის 4 აპრილს მომხდარ ფაქტთან დაკავშირებით მიმდინარეობს. საქმეზე უკვე გამოკითხული არიან გარდაცვლილთან შემხებლობაში მყოფი პირები, მათ შორის მისი ოჯახის წევრები და მეუღლე.
ამასთან, პროკურატურის განცხადებით, მსჯავრდებულ ირაკლი ღარიბაშვილისა და სხვა პირების მიერ ბოლო დღეებში საჯაროდ გაკეთებული განცხადებების საფუძველზე გამოძიების ფარგლებში დამატებით გამოიკითხებიან ნიკა გვარამია, ირმა ინაშვილი, ნანუკა ჟორჟოლიანი, ხატია დეკანოიძე, თაზო დათუნაშვილი, გია ხუხაშვილი, გიორგი ლილუაშვილი, ზაზა დავითაია, ერმილე ნემსაძე და გიორგი გიგაური.
უწყების ცნობით, ამავე სისხლის სამართლის საქმეზე გამოიკითხება თავად ირაკლი ღარიბაშვილიც.
„მაღალი საჯარო ინტერესის გათვალისწინებით, აღნიშნული პირების გამოკითხვის შედეგების შესახებ, ლაზარე ჯორბენაძის თვითმკვლელობის ფაქტთან დაკავშირებით, თუ რაიმე ახალი გარემოებები გახდა ცნობილი, საზოგადოებას დამატებით მივაწვდით ინფორმაციას“, — აცხადებს პროკურატურა.
ლაზარე ჯორბენაძის გარდაცვალების საკითხი პოლიტიკურ დღის წესრიგში მას შემდეგ გააქტიურდა, რაც ირაკლი ღარიბაშვილმა ციხიდან გამოგზავნილ წერილში მისი გარდაცვალების რეალური მიზეზის დადგენა მოითხოვა და მომხდართან დაკავშირებით კითხვები საჯაროდ დასვა.
