საქართველოს ყოფილი პრემიერ-მინისტრის, ირაკლი ღარიბაშვილის ადვოკატის, ლილი გელაშვილის განცხადებით, მისი დაცვის ქვეშ მყოფის წინააღმდეგ მიმდინარე პროცესის მიზანი ღარიბაშვილის პოლიტიკური რეიტინგის განულება და პოლიტიკაში მისი შესაძლო დაბრუნების გამორიცხვაა.
გელაშვილის თქმით, ღარიბაშვილს, რომელიც ორჯერ იყო საქართველოს პრემიერ-მინისტრი, საზოგადოებაში რეიტინგი ჰქონდა და, მისი ვარაუდით, შესაძლოა დღესაც ჰქონდეს.
„ყველასთვის გასაგები იყო, რომ მას ქვეყნისთვის არ უღალატია, არც ბიძინა ივანიშვილისთვის უღალატია და არც ბიუჯეტიდან თეთრი არ მოუპარია. შესაბამისად, ალბათ, გახდა საჭირო და ფაქტია, ასე იყო, შემონათვალშიც ეს იგულისხმება, რომ მას აუცილებლად კორუმპირებული ადამიანის სახელი უნდა დარქმეოდა, რათა ეს რეიტინგი გაენულებინათ და მას აღარ ჰქონოდა 1%-იანი შანსიც კი, გადაზღვევის მიზნით, რომ პოლიტიკაში მობრუნებულიყო“, — განაცხადა გელაშვილმა „ტვ პირველთან“.
ადვოკატი ასევე აცხადებს, რომ პატიმრობაში მყოფი ყოფილი პრემიერ-მინისტრის უფლებები ირღვევა და სახალხო დამცველს მოუწოდებს, თავად ან მისი წარმომადგენელი ღარიბაშვილთან შევიდეს და არსებული ვითარება შეისწავლოს.
გელაშვილის ინფორმაციით, 26 აგვისტოს ღარიბაშვილს შვილებთან ხანგრძლივი პაემანი ჰქონდა ჩანიშნული, თუმცა შეხვედრა გაუუქმეს. მისი თქმით, ყოფილ პრემიერს მცირეწლოვანი შვილები სამი თვის განმავლობაში არ უნახავს.
„როდესაც მცირეწლოვან შვილებს სამი თვის განმავლობაში არ გაჩვენებენ და პაემანს გიუქმებენ, ეს მისი უფლებების დარღვევაა. გადაამოწმოს სახალხო დამცველმა, სიმართლეს ვამბობთ თუ არა ჩვენ“, — განაცხადა ადვოკატმა.
ლილი გელაშვილი სახალხო დამცველს მოუწოდებს, გადაამოწმოს როგორც გაუქმებული პაემნის გარემოებები, ისე პატიმრობაში ირაკლი ღარიბაშვილის უფლებრივი მდგომარეობა.
