პოლიციამ აფხაზი ბლოგერის, დაურ ბუავას გარდაცვალების საქმეზე უცხო ქვეყნის მოქალაქე დააკავა. შინაგან საქმეთა სამინისტროს ინფორმაციით, მას ბრალად განსაცდელში მიტოვება ედება.
უწყების ცნობით, გამოძიებით დადგინდა, რომ დაკავებული და დაურ ბუავა მეგობრები იყვნენ და თბილისში, დიდ დიღომში, ბუავას დროებით საცხოვრებელ ბინაში ერთად იმყოფებოდნენ, სადაც ნარკოტიკული საშუალება მოიხმარეს. ამის შემდეგ ორივე მათგანი შეუძლოდ გახდა.
შსს-ს განცხადებით, დაკავებულის გამოკითხვის შედეგად ირკვევა, რომ მან კრიტიკულად მძიმე და სიცოცხლისთვის საშიშ მდგომარეობაში მყოფი დაურ ბუავა ბინაში მარტო დატოვა.
„ბრალდებულმა საცხოვრებელი ბინის კარი მეორე გასაღებით გარედან ჩაკეტა და შემთხვევის ადგილიდან წავიდა ისე, რომ მომხდარის შესახებ არავისთვის უცნობებია და დაურ ბუავას დასახმარებლად არავისთვის მიუმართავს“, — ნათქვამია სამინისტროს განცხადებაში.
უწყების ინფორმაციით, გამოძიება სისხლის სამართლის კოდექსის 115-ე — თვითმკვლელობამდე მიყვანისა და 128-ე — განსაცდელში მიტოვების მუხლებით მიმდინარეობს.
საქმეზე კომპლექსური საგამოძიებო მოქმედებები გრძელდება.
დაურ ბუავა თბილისში, საცხოვრებელ ბინაში გარდაცვლილი იპოვეს. შინაგან საქმეთა სამინისტრომ მანამდე განაცხადა, რომ ცხედარს პირველადი დათვალიერებით ძალადობის კვალი არ აღენიშნებოდა.
