თბილისში გარდაცვლილი აფხაზი ბლოგერის, დაურ ბუავას ცხედარს პირველადი დათვალიერებით ძალადობის კვალი არ აღენიშნება. ამის შესახებ „ინტერპრესნიუსს“ შინაგან საქმეთა სამინისტროში განუცხადეს.
უწყების ინფორმაციით, ბუავას ცხედარი ლევან სამხარაულის სახელობის სასამართლო ექსპერტიზის ეროვნულ ბიუროშია გადასვენებული, სადაც ექსპერტიზა უტარდება. გარდაცვალების ზუსტი მიზეზი ამ დროისთვის უცნობია.
დაურ ბუავა თბილისში, საცხოვრებელ ბინაში გარდაცვლილი იპოვეს. არსებული ინფორმაციით, იგი შესაძლოა რამდენიმე დღის გარდაცვლილი ყოფილიყო.
არაოფიციალური ცნობით, კორპუსში მძაფრი სუნის გამო მეზობლებმა სამაშველო სამსახური გამოიძახეს. ბინაში შესულ მაშველებს ბუავა გარდაცვლილი დახვდათ.
მომხდარზე გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
გარდაცვალების მიზეზის დასადგენად გამოძიება სასამართლო-სამედიცინო ექსპერტიზის შედეგებს ელოდება.
