აშშ-ის ფინანსთა მინისტრის, სკოტ ბესენტის განცხადებით, შეერთებული შტატები ირანის წინააღმდეგ „ისტორიაში ყველაზე მკაცრ სანქციებს“ დააწესებს. მისი შეფასებით, მაქსიმალურმა ეკონომიკურმა ზეწოლამ შესაძლოა ახალი ფართომასშტაბიანი სამხედრო მოქმედებების საჭიროება შეამციროს.
„არ ვარ დარწმუნებული, რატომ გაჩნდა ამ საკითხში ნავთობის თემა. თუ მაქსიმალურ ეკონომიკურ ზეწოლას განვახორციელებთ, მაშინ, სავარაუდოდ, ფართომასშტაბიანი სამხედრო მოქმედებების განახლება აღარ იქნება“, — განაცხადა ბესენტმა.
მანამდე აშშ-ის პრეზიდენტმა დონალდ ტრამპმა ირანის წინააღმდეგ ახალი ეკონომიკური სანქციები დააანონსა და განაცხადა, რომ მათი მიზანი ქვეყნის მაქსიმალური ეკონომიკური იზოლაცია იქნება.
„არავის მიუცია ირანის ისლამური რესპუბლიკისთვის შეთანხმების დადების უფრო დიდი შესაძლებლობა, ვიდრე მე. მათდა სამწუხაროდ, ეს ვერ შეძლეს. ამიტომ, დღეს ვაცხადებ ყველაზე გამანადგურებელ ეკონომიკურ ოპერაციას, რაც კი ოდესმე განხორციელებულა რომელიმე ქვეყნის წინააღმდეგ! ეს იქნება უპრეცედენტო მასშტაბის ეკონომიკური ომი და იზოლაცია“, — დაწერა ტრამპმა სოციალურ ქსელში.
ბესენტის განცხადებით, ვაშინგტონის გათვლა სწორედ ეკონომიკური ზეწოლის მაქსიმალურად გაძლიერებაზეა, რათა ირანის წინააღმდეგ ახალი მასშტაბური სამხედრო ოპერაციების საჭიროება შემცირდეს.
