უკრაინის პრეზიდენტის, ვოლოდიმირ ზელენსკის განცხადებით, აშშ-ის Patriot-ის ტიპის საზენიტო-სარაკეტო სისტემების რაკეტების მარაგის 5% უკრაინისთვის საკმარისი იქნება, რათა ქვეყანამ ზამთარი გადაიტანოს და მშვიდობიანი მოსახლეობის სიცოცხლე დაიცვას. ამის შესახებ მან CNN-თან ინტერვიუში განაცხადა.
ზელენსკის თქმით, 2026 წელს უკრაინას ჰაერსაწინააღმდეგო რაკეტები ორნახევარჯერ ნაკლები აქვს, ვიდრე 2025 წელს, მაშინ როცა რუსეთი თვეში ორჯერ მეტ ბალისტიკურ რაკეტას უშვებს. მისი შეფასებით, მასშტაბური სარაკეტო და დრონებით თავდასხმები თითქმის ყოველდღიურად გრძელდება, რის გამოც მოსახლეობა მძიმე ზეწოლის ქვეშ იმყოფება.
„თუ აშშ თავისი მარაგის 5%-ს მოგვყიდის, ზამთარს გადავიტანთ და ადამიანების სიცოცხლეს გადავარჩენთ. თუ 10%-ს მოგვყიდიან, მაშინ ყველა რუსულ ბალისტიკურ რაკეტას გავანადგურებთ. ამჟამად მხოლოდ 1% მაქვს“, – განაცხადა ზელენსკიმ.
უკრაინის პრეზიდენტის თქმით, საჭირო რაკეტების მისაღებად ყოველდღიურად მრავალ სატელეფონო ზარს ახორციელებს და პარტნიორებთან ინტენსიურ მოლაპარაკებებს აწარმოებს.
