საქართველოს პრემიერ-მინისტრის ირაკლი კობახიძის განცხადებით, ოპოზიციური პარტიები ხალხის მხარდაჭერის მოპოვებაზე არ არიან ორიენტირებული და მათი მიზანი მხოლოდ „გარე ძალების“ მოწონებაა. ამის შესახებ მან ჟურნალისტების კითხვაზე პასუხად განაცხადა.
კობახიძის თქმით, 2012 წელს პოლიტიკაში ბიძინა ივანიშვილის გამოჩენამ ოპოზიციას „ჭადრაკის პარტია ჩაუტარა“ და აჩვენა, „ვინ იყო რეალურად ნამდვილი გროსმაისტერი“.
„მე მინდა გითხრათ, რომ 2012 წელსაც ისინი იყვნენ აგენტურა, მაგრამ შემოვიდა პოლიტიკაში ბიძინა ივანიშვილი და ჩაუტარა ჭადრაკის პარტია. თავი რომ რაღაც ეგონათ, აჩვენა, ვინ იყო რეალურად ნამდვილი გროსმაისტერი“, – განაცხადა ირაკლი კობახიძემ.
პრემიერის შეფასებით, საქართველოში მოქმედი ზოგიერთი პოლიტიკური პარტია შეგნებულად იქცევა ისე, რომ საზოგადოების ნდობა დაკარგოს, რადგან მათი მთავარი ადრესატი, მისი თქმით, ქართველი ამომრჩეველი კი არა, „გარე ძალებია“.
კობახიძემ ასევე განაცხადა, რომ 2012 წლის შემდეგაც ოპოზიცია მუდმივად სარგებლობდა უცხოელი პარტნიორების მხარდაჭერით, თუმცა, მისი თქმით, ეს პოლიტიკურ შედეგებზე არ ასახულა.
„2012 წელს მიიღეს ერთი ჭადრაკის პარტია და 2012 წლის შემდეგ მიიღეს კიდევ ზევიდან 9 დამატებითი ჭადრაკის პარტია და ასე გაგრძელდება“, – განაცხადა პრემიერ-მინისტრმა.
