ვოლოდიმირ ზელენსკი: უკრაინა რუსეთის თავდასხმებზე ისეთ პასუხს გასცემს, რომელიც მის საომარ შესაძლებლობებს შეასუსტებს

უკრაინის პრეზიდენტის, ვოლოდიმირ ზელენსკი განცხადებით, უკრაინა რუსეთის თავდასხმებზე რეაგირებას გააგრძელებს ისე, რომ მაქსიმალურად შეასუსტოს რუსეთის შესაძლებლობა, ომი გააგრძელოს.

ზელენსკიმ განცხადება ზაპოროჟიეს, დნეპრის, ხერსონის, ხარკოვის, დონეცკისა და სუმის ოლქებზე რუსეთის მიერ განხორციელებული დარტყმების შეფასებისას გააკეთა.

მისი თქმით, ზაპოროჟიეში რუსმა სამხედროებმა უპილოტო საფრენი აპარატებით სამოქალაქო ობიექტებსა და ტრანსპორტზე მიიტანეს იერიში, ხოლო დნიპროზე განხორციელებულ თავდასხმას „სასტიკი და სრულიად უაზრო“ უწოდა.

„რუსეთი აგრძელებს ტერორისტულ ომს უკრაინისა და უკრაინელების წინააღმდეგ. რა თქმა უნდა, სამართლიანად ვუპასუხებთ რუსეთის ყველა თავდასხმას და ამას გავაკეთებთ ისე, რომ პირველ რიგში დაზარალდეს რუსული სახელმწიფო სისტემა და რუსეთის უნარი გააჭიანუროს ომი“, – განაცხადა ზელენსკიმ.

უკრაინის პრეზიდენტის შეფასებით, რუსეთში საწვავის დეფიციტი, სხვა ფაქტორებთან ერთად, უკრაინის მიერ განხორციელებული შორი მანძილის საჰაერო დარტყმების შედეგიც არის.

„ჩვენ ვაბრუნებთ ომის რეალობას რუსეთში და მაქსიმალურად ვართულებთ ჩვენი მიწის ოკუპაციის გაგრძელებას“, – აღნიშნა ვოლოდიმირ ზელენსკიმ.