მშვიდობის აღდგენის დროა და ვფიქრობ, ჩვენ ამას გავაკეთებთ, - ამის შესახებ აშშ-ის პრეზიდენტმა, დონალდ ტრამპმა საფრანგეთის პრეზიდენტთან, ემანუელ მაკრონთან ერთად გამართულ პრესკონფერენციაზე განაცხადა.
„ჩვენი დღევანდელი შეხვედრის მიზანი კიდევ ერთი ბრძოლის დასრულებაა, მართლაც საშინელი ბრძოლის დასრულებაა, რომლის მსგავსიც მეორე მსოფლიო ომის შემდეგ არ გვინახავს. მშვიდობის აღდგენის დროა და ვფიქრობ, ჩვენ ამას გავაკეთებთ. ჩვენ შესანიშნავი საუბრები გვქონდა, მათ შორის რუსეთთანაც“, - განაცხადა დონალდ ტრამპმა.
მისი თქმით, აშშ-მ უკრაინას გაცილებით მეტი დახმარება გაუწია, ვიდრე სხვა ქვეყნებმა და აღნიშნა, რომ ევროპისა და აშშ-ის მიერ დახარჯულ თანხებს შორის ძალიან დიდი განსხვავებაა.
„მოხარული ვარ, რომ მაკრონიც მეთანხმება იმის შესახებ, რომ მშვიდობის უზრუნველყოფის ხარჯები და ტვირთი ევროპულმა ქვეყნებმაც უნდა აიღონ და არა მხოლოდ აშშ-მა და რომ ევროპამ უკრაინის ხანგრძლივი უსაფრთხოების უზრუნველსაყოფად ცენტრალური როლი უნდა შეასრულონ, რისი გაკეთებაც მათ სურთ“, - აღნიშნა აშშ-ის პრეზიდენტმა.
საფრანგეთის პრეზიდენტის, ემანუელ მაკრონის განცხადებით, „მშვიდობა უკრაინის დანებებას ან გარანტიების გარეშე ცეცხლის შეწყვეტას არ უნდა ნიშნავდეს“.
„ამ მშვიდობამ უკრაინის სუვერენიტეტი უნდა უზრუნველყოს და უკრაინას საშუალება უნდა მისცეს სხვა დაინტერესებულ მხარეებთან იმ საკითხებზე მოლაპარაკებები შეძლოს, რომელიც მას ეხება. ასევე, ეს არის ქვეყანა, სადაც ჩვენ პასუხისმგებლობა უნდა ავიღოთ, რათა უკრაინისა და მთელი რეგიონის უსაფრთხოების უზრუნველყოფა შევძლოთ. ევროპელებისთვის ეს ეგზისტენციალური საკითხია“, - განაცხადა საფრანგეთის პრეზიდენტმა.
ამასთან, პრესკონფერენციამდე, ოვალურ კაბინეტში შეხვედრისას ემანუელ მაკრონმა უკრაინის ევროპული მხარდაჭერის შესახებ საუბრისას დონალდ ტრამპს სიტყვა შეაწყვეტინა.
„როგორც გესმით, ევროპა უკრაინას ფულს ასესხებს და ისინი იღებენ ფულს უკან“, - აღნიშნა ტრამპმა, რა დროსაც მაკრონმა ხელი ჩასჭიდა ტრამპს და უთხრა:
„არა, სიმართლე გითხრათ, ჩვენ გადავიხადეთ. ჩვენ გადავიხადეთ მთლიანი ძალისხმევის 60%. აშშ-ს მსგავსად: სესხები, გარანტიები, გრანტები. ჩვენ გვაქვს 230 მილიარდი დოლარის გაყინული აქტივები ევროპაში, რუსული აქტივები. მაგრამ ეს არ არის სესხის უზრუნველყოფა", რადგან მაკრონის თქმით, ეს არ არის "ჩვენი საკუთრება", ის გაყინულია.
"თუ, საბოლოოდ, მოლაპარაკების შედეგად, რუსეთი მზად იქნება გადმოსაცემად, შესანიშნავი იქნება, ეს საბოლოოდ სესხად ჩაითვლება და რუსეთი გადაიხდის".
ამის პასუხად კი ტრამპმა თქვა, "თუ გჯერა ამის, ეს კარგია ჩემთვის".
