ისრაელის თავდაცვის ძალებმა „ჰამასის“ მიერ 7 ოქტომბერს გატაცებული კიდევ 4 ადამიანის დაღუპვა დაადასტურა.
ისრაელის არმიაში აცხადებენ, რომ 51, 79, 80 და 85 წლის მძევლები ისრაელის მიერ ჩატარებული ოპერაციის დროს ღაზის სექტორის სამხრეთ ნაწილში, ხან იუნისში დაიღუპნენ და მათი ცხედრები კვლავ ბოევიკებს აქვთ.
„ჩვენი შეფასებით, ოთხივე მათგანი ხან იუნისში, „ჰამასის“ წინააღმდეგ ჩვენი ოპერაციის დროს დაიღუპა“, - განაცხადა ისრაელის თავდაცვის ძალების პრესსპიკერმა, დანიელ ჰაგარიმ, თუმცა სხვა დეტალები არ დაუკონკრეტებია.
ისრაელის ხელისუფლების ცნობით, „ჰამასმა“ 7 ოქტომბერს ისრაელზე განხორციელებული თავდასხმების დროს დაახლოებით 1 200 ადამიანი მოკლა და 251 მძევლად აიყვანა. ჯგუფმა ნოემბერში, ერთკვირიანი ზავის დროს 105 მშვიდობიანი მოქალაქე გაათავისუფლა. დაახლოებით 120 მძევალი უგზო-უკვლოდ დაკარგულად რჩება. ისრაელის ოფიციალური პირები აცხადებენ, რომ ბევრი მათგანი, სავარაუდოდ, დაღუპულია.
IPN
