დავიდ ტრეზეგე "წალენჯიხის იუვენტუსის აკადემიის" გახსნაში მიიღებს მონაწილეობას

ტურინის "იუვენტუსის" ლეგენდარული ფრანგი ფეხბურთელი, 1998 წლის მსოფლიო ჩემპიონი და 2006 წლის ვერცხლის მედალოსანი, დავიდ ტრეზეგე საქართველოში იმყოფება.

ქვეყანაში ის "წალენჯიხის იუვენტუსის აკადემიის" მოწვევით იმყოფება და ვიზიტის ფარგლებში, საფეხბურთო აკადემიის გახსნაში მიიღებს მონაწილეობას.

"სამეგრელოს მონახულების შემდეგ, ფრანგი ფეხბურთელი "იუვენტუსის" ფანკლუბის წევრებს და ფეხბურთის გულშემატკივრებს შეხვდება.

დავიდ ტრეზეგე ერთ-ერთი გამორჩეული ფეხბურთელია, რომელმაც საფრანგეთის ნაკრებთან ერთად 1998 წელს მსოფლიო ჩემპიონატი მოიგო. ამასთან, დავიდ ტრეზეგემ გადამწყვეტი როლი ითამაშა საფრანგეთის მიერ 2000 წლის ევროპის ჩემპიონატის მოგებაში, რადგან იტალიის წინააღმდეგ გამართულ ფინალში ე.წ. "ოქროს გოლი" სწორედ მან გაიტანა. სპორტული კარიერის განმავლობაში, ტრეზეგემ რამდენიმე კლუბი გამოიცვალა და ჯამში, 448 მატჩი ჩაატარა და 229 გოლი გაიტანა. ყველაზე დიდი დრო, კერძოდ ათი წელი, ტრეზეგემ ტურინის "იუვენტუსში" დაჰყო, სადაც 2000-2010 წლებში თამაშობდა" - ნათქვამია ინფორმაციაში, რომელსაც "წალენჯიხის იუვენტუსის აკადემია" ავრცელებს.