რა პრობლემა შექმნა ოპოზიციის წარმომადგენელმა ცესკო-ში ამ წლების განმავლობაში, რა დილემები დააყენა? - ამ ცვლილებით ევროპული რეკომენდაცია სარჩევნო ნაწილში შესრულებულად ჩაითვლება? ამად გვიღირს, რომ შეიძლება არ ჩაითვალოს ეს რეკომენდაცია შესრულებულად? ამ საკითხს ასე ვუყურებ, - ამის შესახებ „სტრატეგია აღმაშენებლის“ დეპუტატმა, პაატა მანჯგალაძემ, პლენარულ სხდომაზე სიტყვით გამოსვლისას განაცხადა, სადაც დეპუტატები „საარჩევნო კოდექსში“ შესატან ცვლილებებს განიხილავენ.
მისივე თქმით, დოკუმენტი სისტემაში ახლაც არაა ატვირთული და შესაბამისად შენიშვნების წამოყენებაც შეუძლებელია.
„იმ შეხვედრაზე, რომელსაც გულისხმობთ თქვენ, ასე ვიცოდით, რომ საორგანიზაციო შეხვედრა იყო, იქ დღის წესრიგიც არ იყო განსაზღვრული, რა შენიშვნები უნდა მოგვეტანა „საარჩევნო კოდექსთან“ დაკავშირებით?! რა არგუმენტია ეს, რომ „ოპოზიციამ არ მოიტანა შენიშვნები და ამის გამო გამოგვაქვს ეს ვერსია“? მითუმეტეს, იურიდიული კომიტეტის შემდეგ, ჩვენც ვითხოვდით შესაბამის ვერსიას, მათ შორის ელექტრონულად და ასეთი ვერსია არ იყო. ახლა რასაც ვიხილავთ, სისტემაშიც არ არის ატვირთული, არც ვიცით, რას ვიხილავთ და შენიშვნა რასთან დაკავშირებით წარმოვადგინოთ?! რაც შეეხება ამ კონკრეტულ მუხლს, ეს იყო შეთანხმების ნაწილი. მახსოვს, მაშინ ირაკლი კობახიძეც იყო ჩართული, შალვა პაპუაშვილიც. შევთანხმდით, კონსენსუსი იყო, რომ ნდობის გაზრდისთვის ადმინისტრაციული ფუნქციები ჰქონოდა, მათ შორის ოპოზიციას. რა პრობლემა შექმნა ოპოზიციის წარმომადგენელმა ამ წლების განმავლობაში, რა დილემები დააყენა? რა საფრთხეები შექმნა, რა რისკები ოპოზიციის არსებობამ? ისე კი არ ვუყურებ საკითხს, რომ ახლა ოპოზიციას ეყოლება იქ წარმოდგენილიყო, არ ეყოლება, მეორეხარისხოვანია. ევროპული რეკომენდაცია სარჩევნო ნაწილში შესრულებულად ჩაითვლება? გვიღირს იმად, რომ ვიღაცა არ მოგწონთ იქ თუ პოლიტიკური წარმომადგენელია, ამად გვიღირს, რომ შეიძლება არ ჩაითვალოს ეს რეკომენდაცია შესრულებულად? ამ საკითხს ასე ვუყურებ. პრობლემა რომ არ ყოფილა აქამდე, ზუსტად ვიცი და არც მომავალში არ შექმნის ოპოზიციის წარმომადგენელი იქნება თუ არა მოადგილე“, - განაცხადა პაატა მანჯგალაძემ.
