ნათია თურნავა: ეროვნული ბანკი მკაცრი მონეტარული პოლიტიკიდან გამოსვლას აგრძელებს

საქართველოს ეროვნული ბანკის პრეზიდენტის მოვალეობის შემსრულებლის, ნათია თურნავას განცხადებით, სებ-ის არსებული პროგნოზის თანახმად, 2024 წელს რეფინანსირების განაკვეთის ეტაპობრივი შემცირება უნდა გაგრძელდეს. შესაბამისად, მათი კრედიტების პროცენტი, ვისაც სესხები ცვლად განაკვეთზე აქვს მიბმული უნდა შემცირდეს.

ეროვნული ბანკის განმარტებით, ქვეყანაში შემცირებული ინფლაციური მოლოდინების გათვალისწინებით, ასევე ქვეყნის სუვერენული რისკის პრემიის შემცირებით, ეკონომიკაში იქმნება ვითარება, რაც რეფინანსირების განაკვეთის ფრთხილი ნაბიჯებით შემცირების შესაძლებლობას ქმნის. 2023 წლის დეკემბერში ქვეყანაში წლიურმა ინფლაციამ მხოლოდ 0.4% შეადგინა. სებ-ი მოელის, რომ 2024 წელს ინფლაცია სამიზნე 3%-იან მაჩვენებელთან ახლოს იქნება.

"საქართველოს ეროვნული ბანკი მკაცრი მონეტარული პოლიტიკიდან გამოსვლას აგრძელებს და მიმდინარე სხდომაზე მონეტარული პოლიტიკის განაკვეთს 0.5 პპ-ით, 9.0%-მდე ამცირებს. აღსანიშნავია, რომ გასული წლის ბოლოს ევროკავშირის წევრობის კანდიდატის სტატუსის მინიჭებამ საქართველოს სუვერენული რისკის პრემია შეამცირა, რამაც, სხვა თანაბარ პირობებში, მონეტარული პოლიტიკის ნეიტრალურ განაკვეთზეც კლების მიმართულებით უნდა იმოქმედოს. შესაბამისად, მიუხედავად პოლიტიკის განაკვეთის შემცირებისა, მონეტარული პოლიტიკა კვლავ მკაცრია და, სხვა თანაბარ პირობებში, ზემოთ აღწერილი რისკების გათვალისწინებით, საქართველოს ეროვნული ბანკი პოლიტიკის განაკვეთის ნორმალიზების მიმართ ფრთხილ მიდგომას შეინარჩუნებს. თუ ინფლაციის მოლოდინებზე ზრდის მიმართულებით მოქმედი ფაქტორები კვლავ გამოიკვეთა, შესაძლოა, მონეტარული პოლიტიკის მეტად გამკაცრება ან მიმდინარე მკაცრი პოზიციის ხანგრძლივად შენარჩუნება გახდეს საჭირო,"- განაცხადა სებ-ის პრეზიდენტის მოვალეობის შემსრულებელმა ნათია თურნავამ.

მონეტარული პოლიტიკის კომიტეტის შემდეგი სხდომა 2024 წლის 13 მარტს ჩატარდება.