საქართველოს ნაკრებმა კვიპროსი დაამარცხა [ვიდეო] #1TVSPORT
18.06.2023 ნახვები: 620
საქართველოს ნაკრებმა ევრო 2024-ის საკვალიფიკაციო ეტაპის მეორე შეხვედრა ლარნაკაში კვიპროსის ნაკრების წინააღმდეგ გამართა და დაძაბულ ბრძოლაში 2:1 გაიმარჯვა.
ვილი სანიოლმა ნორვეგიასთან მატჩის შემდეგ შემადგენლობა შეცვალა – დაცვაში ლუკა ლოჩოშვილი გამოჩნდა, ტრავმის შემდეგ თერთმეტეულში ოთარ კიტეიშვილი დაბრუნდა, ფრანგმა სპეციალისტმა ძირითადში ადგილი ანდო გიორგი ჩაკვეტაძეს, შეტევაში კი გიორგი მიქაუტაძე და ხვიჩა კვარაცხელია დააყენა.
პირველი სახიფათო მომენტი ქართველებმა შექმნეს – მე-7 წუთზე გიორგი მიქაუტაძემ დაარტყა, მაგრამ ბურთი კარს ააცილა. მე-9 წუთზე მასპინძლებს ანგარიშის გახსნა შეეძლოთ, მაგრამ მამარდაშვილმა საკუთარი შეცდომა თავადვე გამოასწორა და „ჯვაროსნები“ გადაარჩინა.
28-ე წუთზე კვარაცხელიამ მშვენიერი გადაცემით მეკარესთან პირისპირ ჩაკვეტაძე დატოვა, მაგრამ მან მეკარეს ვერ აჯობა.
საქართველოს ნაკრებმა 31-ე წუთზე ანგარიში მაინც გახსნა – გიორგი მიქაუტაძემ გადაცემა ჩაჭრა, მეკარესთან პირისპირ გავიდა და ზუსტადაც დაარტყა. მაგრამ რვა წუთში საქართველოს კარში პენალტი დაინიშნა, რომელიც იოანის პიტასმა შეასრულა – მამარდაშვილი ბურთს კი მისწვდა, მაგრამ მოგერიება ვერ მოახერხა. ტაიმი 1:1 დასრულდა.
მეორე ნახევარში კვიპროსელებმა ზონები კარგად გადაკეტეს და საქართველოს ნაკრები თამაშში გარდატეხის შეტანას ვერ ახერხებდა.
საქართველოს ნაკრები მთელი ძალით შეტევაში წავიდა და 84-ე წუთზე ამ მცდელობამ შედეგი გამოიღო – შეცვლაზე შესულმა ზურიკო დავითაშვილმა მოახერხა გოლის გატანა და საქართველოს ნაკრების დაწინაურება.
საბოლოოდ, საქართველოს ნაკრებმა უმნიშვნელოვანესი გამარჯვება მოიპოვა.
მომდევნო მატჩს ქართველები 20 ივნისს გლაზგოში, შოტლანდიის წინააღმდეგ გამართავენ.
კვიპროსი – საქართველო 1:2
გოლები: 0:1 მიქაუტაძე (31), 1:1 პიტასი (39. პენალტი). 1:2 დავითაშვილი (84)
კვიპროსი (3-5-1-1): მოლი – ანტონიუ, კარო (63. ანტონიადესი), გოგიჩი, ლაიფისი – ანტონიუ, ხარლამპოსი (77. სატსაისი), კუსულისი, კასტანიოსი, კორეა, ციონისი (60. ლოიზოუ), პიტასი (77. კრისტოფი)
სათადარიგოები: პანაი, დ. დემეტრიუ, მიხაელი, კორეა, ხრისტოფი, ილია, პილეასი, ანდრეუ, სერგიუ, სატსიასი.
მწვრთნელი: თემურ ქეცბაია
საქართველო (3-4-2-1): მამარდაშვილი – კაკაბაძე, კაშია, ლოჩოშვილი (87. დვალი)– გოჩოლეიშვილი (74. ს. ლობჟანიძე), კვეკვესკირი (74. გაგნიძე), კიტეიშვილი, აზაროვი – ჩაკვეტაძე (74. დავითაშვილი), კვარაცხელია – მიქაუტაძე (88. ზივზივაძე).
სათადარიგოები: ლორია, გუგეშაშვილი, გველესიანი, კვირკველია, ქვილითაია, შენგელია, ალთუნაშვილი,
მწვრთნელი: ვილის სანიოლი
არბიტრი: ფაბიო ვერისიმო (პორტუგალია)
