ბიძინა ივანიშვილი პოლიტიკაში არ მონაწილეობს, ამიტომ ნებისმიერი ასეთი განმარტება ჩვეულებრივი მანიპულაცია და დეზინფორმაციაა, რაც გვესმის, ამაში ახალი არაფერია, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, „არის ხალხი, განსაკუთრებით ის ქართველები, ვინც ყველაფერს აკეთებს, რომ საქართველოს ხელისუფლების დისკრედიტაცია მოახდინონ, გამოაცხადონ ანტიდასავლურად“.
„მათი უცხოელი მფარველები და პარტნიორები ზუსტად ამ მიზანში ჯდებიან. სია აიღეთ იმ ხალხის, ვინც პრემიერის განცხადებების მანიპულაცია მოახდინა. აიღეთ სია და ჩამოწერეთ უცხოელები და ქართველები, გვერდზე მიუწერეთ – ეს ადამიანი ეწინააღმდეგება საქართველოს ევროკავშირში ინტეგრაციას. სხვათა შორის, ნიშანდობლივი იყო, რომ სხვადასხვა კუთხიდან გამოჩნდნენ ადამიანები, ვინც რაღაც ეტაპებზე ტალღის სახით წამოიწევენ ხოლმე და ეს არის იმის კარგი ნიშანი, როდის ირთვება პროპაგანდა. ვინ რომელი ექსპერტი წამოიწია როგორც ტალღა, ნახეთ. ყველამ ერთი და იმავე ვიდეოს გაზიარება დაიწყო, შესაბამისი კომენტარებით. რაც გუშინწინ ვნახეთ, ეს არის პროპაგანდისტული მეთოდი. ჩანს, რომ ეს არის ერთი შეკრული გუნდი – შიგნით რადიკალური ოპოზიცია და ქვეყნის გარეთ სავარძელზე წამომჯდარი ექსპერტები, ვინც საქართველოში ბოლო წლებში ნამყოფი არ არიან და წარმოდგენა არ აქვთ, რა ხდება. არიან „ნაციონალური მოძრაობის“ ე.წ. მხარდამჭერი ექსპერტები. ვნახეთ, როგორ მუშაობს პროპაგანდისტული გუნდი, ქსელი, რომელიც ქვეყნის შიგნით და გარეთ არის. ის, რომ სალომე ზურაბიშვილმა ბიძინა ივანიშვილი არ ახსენა, სინამდვილეში ეს მარტივ რამეს ადასტურებს – ბიძინა ივანიშვილი პოლიტიკაში არ მონაწილეობს. შესაბამისად, მას პოლიტიკურ გამოსვლებში არ ახსენებს არც პრეზიდენტი და არც სხვა, რადგან ის პოლიტიკაში არ მონაწილეობს. ხელის გულზე ეს დევს და ეს არის სიმართლე. სხვა დანარჩენი მანიპულაციაა. არის კონსპირაციების თეორიებია, რომელსაც ქვეყნის შიგნით რადიკალური ოპოზიცია და გარეთ უცხოელი პროპაგანდისტები ცდილობენ, დაამკვიდრონ“, – განაცხადა პაპუაშვილმა.
