მოდელი, რაც ახლა არის შემოთავაზებული, პარლამენტმა აუცილებლად უნდა მიიღოს, რათა ძალაუფლების გაზიარება უმრავლესობასა და ოპოზიციას შორის დაფუძნდეს ამ სისტემაში, - ამის შესახებ „ახალგაზრდა იურისტთა ასოციაციის" წარმომადგენელმა, ვახუშტი მენაბდემ საკონსტიტუციო ცვლილებებით გათვალისწინებულ საპარლამენტო ფრაქციების ფორმირებაზე საუბრისას განაცხადა.
რაც შეეხება პროკურატურის მიმართულებით საკონსტიტუციო ცვლილებებს, როგორც ვახუშტი მენაბდე ფიქრობს, „ქართული ოცნება" ცვლილებებს მხარს თუ არ დაუჭერს, ის ვერც განხორციელდება.
„სამწუხაროდ, ამას კითხვის ნიშანს უსვამს მმართველი გუნდი. მმართველ გუნდს ეს ცვლილებები არ მოსწონს, რადგან მას უნდა სრულად კონტროლირებული პროკურატურა და ის, რასაც გვთავაზობს, აძლევს მმართველ გუნდს შესაძლებლობას, აკონტროლოს გენერალური პროკურორი და მისი მეშვეობით აკონტროლოს მთელი პროკურატურის სისტემა. თუ „ქართულმა ოცნებამ" გადაწყვიტა, რომ ამ ფორმატს მხარი არ დაუჭიროს, ვშიშობ, ოპოზიციას არ ექნება არავითარი ბერკეტი, წინააღმდეგობა გაუწიოს ამ განზრახვას, რადგან სხვა შემთვევაში, მას მოუწევს კოსტიტუციაში სხვა ცვლილებების დადებაც, რაც არ შედის არავის ინტერესში, არც ოპოზიციის, არც ქვეყნის ინტერესში. ამიტომ თუ „ქართული ოცნება" მხარს არ დაუჭერს პროკურატურის მიმართულებით განსახორციელებელ ცვლილებებს, ვფიქრობთ, ის ვერც განხორციელდება", - განაცხადა ვახუშტი მენაბდემ.
შეგახსენებთ, საკონსტიტუციო ცვლილებების პროექტი მომდევნო ორი საპარლამენტო არჩევნებისთვის ბარიერის ორ პროცენტამდე დაწევას ითვალისწინებს და მანდატების განაწილების პროპორციულ წესს ადგენს. ასევე, ცვლილებების მიხედვით, საპარლამენტო ფრაქციების შესაქმნელად წევრთა რაოდენობა შვიდიდან ოთხამდე მცირდება. ამავე პროექტის თანახმად, შემდეგი გენერალური პროკურორები კვალიფიციური უმრავლესობით აირჩევიან, ხოლო თუ ამ წესით არჩევა ვერ მოხდა, არჩევა შესაძლებელი იქნება 76 დეპუტატის მხარდაჭერით.
