რუსეთის პრეზიდენტმა, ვლადიმერ პუტინმა საბრძოლო მოქმედებებში მონაწილე მოხალისეებისა და დაქირავებული მებრძოლების დისკრედიტაციისა და მათ შესახებ ყალბი ამბების გავრცელების შესახებ კანონს ხელი მოაწერა.
რუსეთის კანონმდებლობაში რუსეთის არმიის დისკრედიტაციისა და მის შესახებ „ფეიკების“ გავრცელების შესახებ მუხლი გასული წლის მარტში, უკრაინაში რუსეთის მიერ ომის დაწყებისთანავე გაჩნდა. ახლა ეს კანონი მოხალისეებზე და დაქირავებულ მებრძოლებზეც გავრცელდება. შესაბამისი კანონი შემუშავდა კერძო სამხედრო კომპანიის „ვაგნერის“ დამფუძნებლის, ევგენი პრიგოჟინის ინიციატივით, რომელმაც იანვარში, სახემწიფო დუმის სპიკერს, ვიაჩესლავ ვოლოდინს მიმართა იმასთან დაკავშირებით, რომ მედია საბრძოლო მოქმედებებში მონაწილე პატიმრებს ნეგატიურ კონტექსტში აშუქებს.
ამასთან, გამკაცრდა აღნიშნული კანონის დარღვევისთვის სასჯელი. სამიდან ხუთ წლამდე გაიზარდა პატიმრობა ყალბი ამბების გავრცელებისთვის და დისკრედიტაციისთვის დამამძიმებელი გარემოებების გარეშე. შვიდ წლამდე პატიმრობას ითვალსწინებს დისკრედიტაცია საპროტესტო გამოსვლების მოწოდებებით ან მძიმე შედეგებით.
