4 მარტიდან 20 მარტის ჩათვლით, ფონდ „ათინათის“ წარდგენით, დიმიტრი შევარდნაძის სახელობის ეროვნული გალერეა პირველად უმასპინძლებს მოქანდაკე კარლო გრიგოლიას ნამუშევრების პერსონალურ და ყველაზე მასშტაბურ გამოფენას, რომელიც მხატვრის თითქმის 60-წლიან (XX საუკუნის 50-იანი წლებიდან ახალი მილენიუმის პირველი წლების ჩათვლით) აქტიურ შემოქმედებით მოღვაწეობას წარმოაჩენს. მოქანდაკის მცირე პლასტიკასა და საპარკო ქანდაკებებთან ერთად წარმოდგენილი იქნება მისი გრაფიკული ნამუშევრებიც.
კარლო გრიგოლია 1927 წელს დაიბადა სენაკში. სამხატვრო აკადემიაში ნიკოლოზ კანდელაკისა და შოთა მიქატაძის სახელოსნოებში სწავლობდა. აკადემიის დამთავრებიდან სიცოცხლის ბოლომდე (2014), ის საკუთარი შემოქმედებითი პრინციპების ერთგული დარჩა - ძერწავდა აბსტრაქტულ ფორმებს, ქმნიდა მოდერნისტული სკულპტურის გრაფიკულ პროექტებს.
კარლო გრიგოლია ნონკონფორმისტ მოქანდაკედ მიიჩნევა. მისი შემოქმედება არ ესადაგებოდა სოციალისტური რეალიზმის საბჭოურ დოქტრინას. მართალია, მხატვარი არასდროს ყოფილა აშკარა დისიდენტი, მაგრამ მისი შექმნილი პლასტიკა შორს იყო იდეოლოგიზებული მონუმენტური ხელოვნებისგან. აბსტრაქტული, სამგანზომილებიანი კომპოზიციები, რომლებსაც მოქანდაკე „პლასტიკურ ფორმებს“ უწოდებდა, და მეზოამერიკული თუ აფრიკული ქანდაკებით შთაგონებული პორტრეტები სრულიად უცხო იყო საბჭოთა ხელოვნებისთვის. საბჭოთა კავშირის დანგრევის შემდეგ, XX საუკუნის 90-იან წლებში, კარლო გრიგოლია ვაშინგტონის თანამედროვე ქანდაკების საერთაშორისო ცენტრის წევრი გახდა და საქართველოს ავანგარდისტ მხატვართა ასოციაციასაც ჩაუდგა სათავეში. მიუხედავად ამისა, მისი სახელი კვლავ უცნობი იყო ფართო აუდიტორიისათვის.
დღეს კი, სრულიად სამართლიანად, კარლო გრიგოლია ქართული მოდერნისტული ქანდაკების ერთ-ერთ ფუძემდებლად ითვლება.
ინფორმაციას კულტურისა, სპორტისა და ახალგაზრდობის სამინისტრო ავრცელებს.
