ნატო-ს აღმოსავლეთით გაფართოებაზე საჭიროა ათიათასჯერ დაფიქრება, – ამის შესახებ უნგრეთის პრემიერ-მინისტრმა, ვიქტორ ორბანმა პარლამენტის წევრებთან საუბრისას განაცხადა, რა დროსაც ნატო-ში ფინეთისა და შვედეთის გაწევრიანების საკითხი განიხილებოდა. ინფორმაციას უნგრული მედია ავრცელებს.
როგორც ორბანმა განაცხადა, ნატო არის უსაფრთხოების გარანტია და უნგრეთისთვის ეროვნულ სტრატეგიულ საკითხს წარმოადგენს, თუმცა მისი თქმით, ის არ არის განწყობილი ენთუზიაზმით ყველაფრის მიმართ, რაც ნატო-ში ხდება.
უნგრეთის პრემიერ-მინისტრის განცხადებით, ადრე თუ გვიან დღის წესრიგში დადგება ალიანსში უკრაინის გაწევრიანების საკითხი.
„ჩვენ ათიათასჯერ უნდა დავფიქრდეთ ნატო-ს აღმოსავლეთით შემდგომ გაფართოებაზე, რათა უნგრეთი არ იქნას ჩათრეული ომში“, – აღნიშნა ორბანმა, თუმცა ხაზი გაუსვა, რომ ეს მოსაზრება არ ეხება ნატო-ში შვედეთისა და ფინეთის გაწევრიანებას.
შეგახსენებთ, რომ შვედეთი და ფინეთი ნატო-ში გაწევრიანების პროცესში არიან. ალიანსში მათი წევრობის განაცხადი ნატო-ს ყველა წევრს აქვს რატიფიცირებული უნგრეთისა და თურქეთის გარდა.
