არასამთავრობო ორგანიზაციები, ისევე როგორც მედია, იცავენ და წარმოადგენენ ინტერესებს, რომ ქვეყანა წავიდეს დემოკრატიისკენ და სწორედ ეს არასამთავრობო ორგანიზაციები იღებენ პასუხისმგებლობას, რომლის ფარგლებშიც იცავენ ადამიანის უფლებებს, – ამის შესახებ USAID-ის საქართველოს მისიის დირექტორმა, ჯონ პენელმა განაცხადა.
როგორც ჯონ პენელმა „ხალხის ძალის“ კანონპროექტთან დაკავშირებით განაცხადა, ეს კარგი პრეცედენტი არ არის.
„დემოკრატიას სჭირდება სწორი ტრაექტორიით განვითარება, რომელიც ხელს შეუწყობს ქვეყანას განვითარდეს ისე, რომ წავიდეს ევროატლანტიკური ინტეგრაციისკენ. შესაბამისად, ნამდვილად არ არის ეს კარგი გადაწყვეტილება მედიისთვის, არასამთავრობო ორგანიზაციებისთვის. მედია და არასამთავრობო ორგანიზაციები მნიშვნელოვან, გადამწყვეტ როლს ასრულებენ სწორედ დემოკრატიის მშენებლობაში. ამ შემთხვევაში არასამთავრობო ორგანიზაციები, ისევე როგორც მედია, იცავენ და წარმოადგენენ ამ ინტერესებს. ისინი იცავენ და წარმოადგენენ ინტერესებს, რომ ქვეყანა წავიდეს დემოკრატიისკენ და სწორედ ეს არასამთავრობო ორგანიზაციები იღებენ იმ პასუხისმგებლობას, რომლის ფარგლებშიც იცავენ შშმ პირების, ბავშვების უფლებებს. ასევეა ჯანდაცვასთან დაკავშირებული საკითხები, ოჯახური ძალადობა, ფერმერთა ასოციაციები, ახალგაზრდები. სწორედ ამიტომ მნიშვნელოვანია, რომ არასამთავრობო ორგანიზაციები აქტიურად იყვნენ ჩართულები პროცესებში“, – განაცხადა ჯონ პენელმა.
