„ნაპოლიმ“ „აინტრახტი“ დაამარცხა

ხვიჩა კვარაცხელიამ ჩემპიონთა ლიგაზე ფრანკფურტის „აინტრახტთან“ გოლის გატანის ორი რეალური შანსი ხელიდან გაუშვა, მაგრამ „ნაპოლის“ გერმანული კლუბის დამარცხებაში შესანიშნავი საგოლე პასით მაინც დაეხმარა – 2:0.

„ნაპოლის“ მწვრთნელმა, ლუჩანო სპალეტიმ მეტოქეს ფრთხილი ტაქტიკა დაუპირისპირა, სტუმრებმა გერმანელების წნეხს გაუძლეს და პირველი მომენტი მე-19 წუთზე შექმნეს –  კვარაცხელიამ ძლიერად დაარტყა, მაგრამ მეკარე კევინ ტრაპმა ბურთი კუთხურზე მოიგერია.

ხვიჩას „ნაპოლის“  დაწინაურების რეალური შანსი 36-ე წუთზე ჰქონდა, როდესაც ვიქტორ ოსიმენმა პენალტი მოიპოვა, მაგრამ ქართველმა თავადმსხმელმა მეკარეს, ვერ აჯობა. თუმცა, მე-40 წუთზე ლოსანოს პასით ოსიმენმა „ნაპოლი“ მაინც დააწინაურა და სტუმრებმა შესვენებამდე უპირატესობა მოიპოვეს – 1:0.

ხვიჩას თავის გამოჩენა 56-ე წუთზეც შეეძლო, მაგრამ მეკარესთან პირისპირ გასულმა ტრაპს ისევ ვერ აჯობა და მშვენიერი შანსი გაანიავა.

58-ე წუთზე კი „აინტრახტი“ მოედანზე 10 კაცით დარჩა – ზამბო ანგისასთან უხეშობისთვის არბიტრმა მოედნიდან კოლო მუანი გააძევა.

65-ე წუთზე კვარაცხელიამ თავისი საქმე მაინც გააკეთა. საჯარიმოში შესულმა, კარის წინ ჯოვანი დი ლორენცო მონახა, ქუსლით შესანიშნავი პასი გაუკეთა და კაპიტანმაც „ნაპოლის“ უპირატესობა გაზარდა.

84-ე წუთზე კვარაცხელია შეცვალეს, „ნაპოლიმ“ კი თამაში გამარჯვებამდე მიიყვანა 2:0.

ჩემპიონთა ლიგის 1/8-ფინალის საპასუხო მატჩი „ნაპოლისა“ და „აინტრახტს“ შორის „სტადიო დიეგო მარადონაზე“ 15 მარტს გაიმართება.

დღის მეორე შეხვედრაში „ლივერპულმა“ მადრიდის „რეალს“ უმასპინძლა. მე-14 წუთისთვის „ლივერპული“ 2:0-ს იგებდა მაგრამ მადრიდელებმა პირველივე ტაიმში მოახერხეს ანგარიშის გათანაბრება. შეხვედრის მეორე ნახევარში „რეალმა“ კიდევ სამი გოლი გაიტანა და საბოლოოდ შეხვედრა 5:2 დასრულდა „სამეფო კლუბის“ სასარგებლოდ.