ამერიკის ელჩს არ დასჭირდებოდა ასეთი მოთქმა-გოდება, რომ არ გადაერჩინა ბიძინა ივანიშვილის რეჟიმი, რომ არ შეეყარა პარლამენტში ოპოზიცია და არ გამოეყვანა კუთხეში მიმწყვდეული ოლიგარქი სამშვიდობოზე, დღეს არ იქნებოდა ასეთი პრორუსული შტურმი, - ამის შესახებ „ლეიბორისტული პარტიის" ლიდერმა, შალვა ნათელაშვილმა განაცხადა.
მან კომენტარი გააკეთა რუსეთ-საქართველოს საკითხზე საქართველოში აშშ-ის ელჩის კელი დეგნანის განცხადებასთან დაკავშირებით.
„ამ წუთში მოვისმინეთ ჩვენი მეგობარი ამერიკის ელჩის განცხადება. მას არ დასჭირდებოდა ასეთი მოთქმა-გოდება, რომ არ გადაერჩინა ბიძინა ივანიშვილის რეჟიმი, რომ არ შეეყარა პარლამენტში ოპოზიცია, არ გამოეყვანა კუთხეში მიმწყვდეული ოლიგარქი სამშვიდობოზე დღეს არ იქნებოდა ასეთი პრორუსული შტურმი. 21-ე საუკუნის სერგო ორჯონიკიძემ, ამჯერად ივანიშვილის სახელით ცნობილმა, დაიწყო კრემლთან მიცემული დავალებების დამაგვირგვინებელი ფაზის აღსრულება, რათა საქართველო დაბრუნდეს რუსული იმპერიალიზმის მონობაში. ყველაფერ ამას წინ უძღვოდა პარლამენტში ოპოზიციის შეყრა, ხელისუფლების ფეხზე წამოდგმა, შეტევაზე გადმოსვლა, პრორუსული სამღვდელოების ქუჩაში გამოსვლა, რუსეთიდან დაფინანსებული ექსტრემისტების თარეში, ჩვენს ქუჩებში ჟურნალისტების ხოცვა-ჟლეტა, „ლეიბორისტული პარტიის" აკრძალვა და ყველაფერი ეს კომპლექტში მომზადდა, რათა ჩვენ გუშინ ამ საშინელი ომის დაწყების წლისთავის წინ რუსეთის საგარეო საქმეთა სამინისტროდან მოგვესმინა განცხადებები ურთიერთობის აღდგენაზე", - განაცხადა შალვა ნათელაშვილმა.
ლეიბორისტული პარტიის ლიდერი რუსეთის საგარეო უწყების წარმომადგენლის განცხადებასაც გამოეხმაურა და აღნიშნა, რომ ურთიერთობები მოსკოვთან შეიძლება აღდგეს მაშინ, როდესაც საოკუპაციო ძალები დატოვებენ საქართველოს ტერიტორიას.
„სხვა ყველანაირი აღდგენა იქნება საქართველოს ჩაყლაპვა. მოსკოვის გუშინდელი განცხადებები, რომ მთავრობასთან აქვს პრეტენზია, ხალხთან არ აქვს არავითარი პრეტენზიები, არის სრული სიცრუე. ყველა მთავრობასთან ძალიან კარგი ურთიერთობა ჰქონდა მოსკოვს. არავინ მთავრობის წევრი არ დაზარალებულა მათი აგრესიით. ათეულ ათასობით ქართველი გაწყდა მათ მიერ წამოწყებულ ომში ისე, რომ მთავრობებს არაფერი არ დამართნიათ და გაგრის სტადიონზეც ჩვეულებრივ უბრალო ხალხის სისხლი დალიეს ისევე, როგორც მათ დაბომბვებს და აგრესიას შეეწირნენ ჩვენი შვილები და რიგითი ჯარისკაცები, გლეხები და ჩვეულებრივზე ჩვეულებრივი ადამიანები. მთავრობებთან რუსეთი ყოველთვის ახერხებდა საერთო ენის გამონახვას და ხანდახან მათ დახმარებასაც კი", - განაცხადა შალვა ნათელაშვილმა.
