ოლაფ შოლცი - ჩვენ გავაგრძელებთ უკრაინის მხარდაჭერას მისი დამოუკიდებლობისა და ერთიანობის დაცვაში, რამდენ ხანსაც საჭირო იქნება

დღეს ერთმანეთს ვხვდებით, რათა უკრაინას მხარდაჭერის, სოლიდარობისა და ერთიანობის გზავნილი გადავცეთ, ეს არის ძალიან მნიშვნელოვანი, რისი გაკეთებაც შევძელით ომის დაწყებიდან ერთი წლის განმავლობაში, – ამის შესახებ გერმანიის კანცლერმა, ოლაფ შოლცმა ბრიუსელში ევროკავშირის სამიტის დაწყების წინ განაცხადა.

„ძალიან კარგია, რომ შეგვიძლია, გვქონდეს დისკუსია უკრაინის პრეზიდენტთან და მას გადავცეთ სოლიდარობის გზავნილი, ასევე ვაჩვენოთ, რომ ჩვენ გავაგრძელებთ უკრაინის მხარდაჭერას მისი დამოუკიდებლობისა და ერთიანობის დაცვაში, რამდენ ხანსაც საჭირო იქნება“, – განაცხადა ოლაფ შოლცმა.

გერმანიის კანცლერის თქმით, ევროკავშირის ქვეყნებს შორის გერმანია არის სახელმწიფო, რომელმაც უკრაინას აღმოუჩინა ყველაზე დიდი ფინანსური და ჰუმანიტარული მხარდაჭერა, ასევე ყველაზე კონკრეტული მხარდაჭერა იარაღის მიწოდების კუთხით.

„აუცილებელია, რომ უკრაინამ შეძლოს საკუთარი თავის დაცვა, ისევე როგორც აუცილებელია, რომ ეს ყოველთვის გაკეთდეს კოორდინირებული, ერთობლივი გზით და არა ცალკეულად“, – განაცხადა შოლცმა უკრაინისთვის შეიარაღების მიწოდების საკითხზე საუბრისას.

ევროკავშირის სამიტამდე ერთი დღით ადრე ოლაფ შოლცი ემანუელ მაკრონთან ერთად პრეზიდენტ ზელენსკის პარიზში შეხვდა.