,,სიგიჟემდე უყვარდათ ბუბა, მახსოვს, ბაქოში ბულვარზე სეირნობისას მაღაზიები იკეტებოდა, ხალხი კი, მის სანახავად გამორბოდა" - ნანი ბრეგვაძე
19.01.2023 ნახვები: 523
ნანი ბრეგვაძე ბუბა კიკაბიძის შესახებ უცნობ ისტორიებს იხსენებს, ბრეგვაძის თქმით, ბუბა მისთვის ოჯახის წევრის იყო.
"ბუბას გარდაცვალება აუნაზღაურებელი დანაკლისია არა მხოლოდ ჩემთვის, არამედ მთელი ქვეყნისთვის, რადგან მართლაც საოცარი პიროვნება დავკარგეთ, რომელიც ყველას უყვარდა და უზარმაზარ პატივს სცემდა. ბუბა ჩემთვის არა უბრალოდ ახლო მეგობარი, არამედ ოჯახის წევრი და უახლოესი ადამიანი იყო. პირველ რიგში, მისი მოკრძალებული ბუნება მინდა აღვნიშნო, რადგან პოპულარობის მიუხედავად, მაინც ბოლომდე შეინარჩუნა თავმდაბლობა. არაჩვეულებრივი მეუღლე ჰყავდა, ირა ყოველთვის მის გვერდით იყო, ერთგულად ზრუნავდა და მაქსიმალურად უწყობდა ხელს მის შემოქმედებას. ბუბამ ძალიან განიცადა ირას გარდაცვალება და ვფიქრობ, სწორედ მისი დაკარგვა ვერ გადაიტანა" - ყვება ბრეგვაძე
