უმთავრესი ღვაწლი, მაინც ქართული ეკლესიის რუსულ ორბიტაზე დატოვებაა-მირცხულავას მილოცვა კათოლიკოს პატრიარქს
04.01.2023 ნახვები: 652
"30 წლის განმავლობაში ეს ერი მუდმივად ორად არის გახლეჩილი, მუდმივად ერთი უპირისპირდება მეორეს და პატრიარქი მუდამ რომელიმე ერთის - ძირითადად ხელისუფლებისა და მისი მხარდამჭერების მხარესაა. ყველაზე მთავარი - ვიცი რომ არავის წამოგაწითლებთ - ყველა ხელისუფლება, გარდა გამსახურდიას ხელისუფლებისა მისი კურთხეული იყო - შევარდნაძეც, სააკაშვილიც, ივანიშვილიც..",-ამის შესახებ სოციალურ ქსელში ანალიტიკოსი გოჩა მირცხულავა წერს.
"ყველა პოზიტიური ეპითეტს შეიძლება შევაგუო ყური გარდა იმისა, რომ პატრიარქი ერის (!) მამაა.
ერის არა - 30 წლის განმავლობაში ეს ერი მუდმივად ორად არის გახლეჩილი, მუდმივად ერთი უპირისპირდება მეორეს და პატრიარქი მუდამ რომელიმე ერთის - ძირითადად ხელისუფლებისა და მისი მხარდამჭერების მხარესაა. ყველაზე მთავარი - ვიცი რომ არავის წამოგაწითლებთ - ყველა ხელისუფლება, გარდა გამსახურდიას ხელისუფლებისა მისი კურთხეული იყო - შევარდნაძეც, სააკაშვილიც, ივანიშვილიც...
იგი არასოდეს ყოფილა მედიატორი - ყოველთვის იყო მხარე და შესაბამისად, არასოდეს ყოფილა ერის გაერთიანების, მისი გამარჯვებების, მისი წარმატების ცენტრში.
უამრავი ეკლესია ააშენა არ ნიშნავს აღმშენებლობას. ამ ეკლესიებში ქრისტე არ არის და ქრისტესთან და ქრისტეში ყოფნას კედელი და კრამიტი სულაც არ სჭირდება. რაც სჭირდება სიყვარულია და აბა, სად არის სიყვარული, ურთიერთ სიძულვილში იხრჩობა ერი. რაც ჭარბად არის ეკლესიაში გახლავთ "შიში", "შიში", "შიში".... ღმერთი დამსჯელ და შურისმაძიებელ "პერსონად" "შეაყვარეს" მრევლს....
თუ ქრისტიანობა ის არის რაც ამ ქვეყნის მართლმადიდებელ ეკლესიაში ხდება პატრიარქის წინამძღოლობით, ღმერთმა ამ ეკლესიას და მის წინამძღოლს გაუმარჯოს, თუ სხვა რამეა, მაშინ ღმერთი თავად მიხედავს ამ საქმეს რა დღეს, რა ხვალ...
ღვაწლი? ჰო, კი.... უმთავრესი ღვაწლი, მაინც ქართული ეკლესიის რუსულ ორბიტაზე დატოვებაა... როგორი ძლიერი უნდა იყო ამას აკეთებდე ხილულად და "ერი" მადლობას გიხდიდეს. აფერუმ...
დაბადების დღე? დიახ, ვულოცავ - ირაკლი გიორგის ძე ღუდუშაურ-შიოლაშვილს 90 წლის იუბილეს",-წერს მირცხულავა
