მედიის ცნობით, კოსოვოს ჩრდილოეთით, ნატო-ს ჯარების პატრულირების ზონაში სროლა იყო, დაშავებულების შესახებ ინფორმაცია არ ვრცელდება
26.12.2022 ნახვები: 575
კოსოვოს ჩრდილოეთით, ნატო-ს ჯარების პატრულირების ზონაში სროლა იყო. დასავლური მედიის ინფორმაციით, ინციდენტი ეთნიკური სერბებით დასახლებულ ტერიტორიაზე მოხდა.
დაშავებულების შესახებ ინფორმაცია არ ვრცელდება.
მანამდე სერბულმა მედიამ გაავრცელა ინფორმაცია, რომ მას შემდეგ, რაც კოსოვოს ხელისუფლებამ ადგილობრივი სერბების მიერ აღმართული ბარიკადის დემონტაჟი სცადა, ადგილზე დაპირისპირება დაიწყო. სერბეთის პრეზიდენტმა, ალექსანდრე ვუჩიჩმა ქვეყნის არმიის მეთაური კოსოვოსთან გამყოფ ხაზზე გაგზავნა.
როგორც მედია წერს, ჩრდილოეთ კოსოვოში მყიფე მშვიდობის შესანარჩუნებლად ნატო-მ 3 700-ზე მეტი ჯარისკაცი განათავსა. სერბეთსა და კოსოვოს ადმინისტრაციას შორის ბოლო დაძაბულობა კოსოვოში სერბული საავტომობილო ნომრების აკრძალვით არის გამოწვეული. აკრძალვასთან დაკავშირებით ადგილობრივი მერები, მოსამართლეები და პოლიციელები, ასობით ადამიანი, რომლებიც ეთნიკური სერბები არიან, პროტესტის ნიშნად თანამდებობიდან გადადგა.
