თადარიგის გენერალმა მამუკა ყურაშვილმა, ტელეკომპანია „ფორმულას" ეთერში, 2008 წლის ომში, ბრძოლის ველზე დაღუპული გმირების გადმოსვენებასთან დაკავშირებით მცდარი და დეზინფორმაციული განცხადება გააკეთა. თითქოს, მე, გენერალმა ჩაჩიბაიამ, დავიბრალე ჩვენი მეომრების გადმოსვენების ოპერაციის ჩატარება.
მინდა გითხრათ, რომ პატრიარქის ინიციატივით და უშუალო ჩართულობით განხორციელდა აღნიშნული ღონისძიება, რომელიც სამარცხვინოდ მიიწერა მამუკა ყურაშვილმა. ნამდვილად არ ექნება მას საამაყოდ საქმე ბოლომდე რომ ვისაუბრო ყველაფერზე, თუ რა მიზეზით წავყევი პატრიარქს მაშინ, როდესაც ჩემი სიცოცხლე შეიძლება ყოფილიყო რისკის ქვეშ.
არ არის სწორი საკუთარი სიმხდალე ვინმეს დისკრედიტაციის გზით გადაფაროს. მე არასდროს, არცერთ ოფიცერზე მისაუბრია საჯაროდ, იმიტომ, რომ არსებობს ოფიცრის ღირსება, რომელიც ყველა ღირსეულმა სამხედრომ უნდა დაიცვას.
ასევე მინდა გავახსენო ყურაშვილს, ვინ იყო მასთან ერთად, როცა იყო მარტო ცხინვალის მიმართულებაზე და შემიძლია გავახსენო კიდევ ბევრი შემთხვევა, სადაც მე ვადვოკატირებდი მასთან დაკავშირებულ საკითხებს. მადლიერება არის ღმერთის ბოძებული ნიჭიერება, რომელიც არ აღმოაჩნდა ბატონ ყურაშვილს.
კიდევ ერთხელ ვაცხადებ, რომ ტყუილია, თითქოს მე ვიბრალებ პატრიარქის ინიციატივას. მარტივად რომ ვთქვა, ჭორაობაა და სამარცხვინო საქციელი, მითუმეტეს თუ ხარ ან იყავი სამხედრო.
აპელირება საკითხზე, თუ რატომ შევედი გადაცმული მტრის კონტროლირებად რაიონში და უღირსი მცდელობები და მინიშნებები, რომ შეიძლება რამე კავშირი ყოფილიყო ჩემსა და რუსეთის სპეცსამსახურებს შორის, არის ყველაზე უღირსი საქციელი, რაც შეეძლო რომ ეკადრებინა საკუთარი თავისთვის. ამ საკითხზე საუბრობს ადამიანი, რომელიც რუსეთში ყალიბდებოდა როგორც ოფიცერი.
