იუსტიციის მინისტრი უფლებამოსილი იქნება, პენიტენციური დაწესებულების დებულებით, დაწესებულებაში სატელეფონო საუბრების რაოდენობა და ხანგრძლივობა გაზარდოს
11.12.2022 ნახვები: 591
იუსტიციის მინისტრი უფლებამოსილი იქნება, პენიტენციური დაწესებულების დებულებით, დაწესებულებაში გაზარდოს სატელეფონო საუბრების რაოდენობა და ხანგრძლივობა.
იუსტიციის სამინისტროს მიერ პარლამენტში წარდგენილ საკანონმდებლო პაკეტში აღნიშნულია, რომ თითოეული პენიტენციური დაწესებულების მიხედვით, დღეისთვის დადგენილი სატელეფონო საუბრების მაქსიმალური რაოდენობა და ხანგრძლივობა მინიმალურ რაოდენობად/ხანგრძლივობად გარდაიქმნება.
ცვლილებებით, შენარჩუნდება წახალისების სახით დამატებითი სატელეფონო საუბრის უფლება.
„უნდა აღინიშნოს, რომ როგორც ევროპის სახელმწიფოთა კანონმდებლობისა და პრაქტიკის კვლევა აჩვენებს, სატელეფონო საუბრის ლიმიტებთან დაკავშირებით არ არსებობს ერთიანი მიდგომა. ასეთი ლიმიტები, უმეტესწილად, დადგენილია კანონქვემდებარე დონეზე და ერთმანეთისგან განსხვავდება ქვეყნების მიხედვით. ციხის ევროპული წესების თანახმად, პატიმრებს უნდა შეეძლოთ, რაც შეიძლება ხშირად იქონიონ ურთიერთობა წერილით, ტელეფონით თუ კომუნიკაციის სხვა საშუალებით თავიანთ ოჯახებთან, სხვა პირებთან და ორგანიზაციის წარმომადგენლებთან. ციხის ადმინისტრაცია უნდა დაეხმაროს პატიმრებს გარე სამყაროსთან ადეკვატური კონტაქტის შენარჩუნებაში და უნდა უზრუნველყოს ისინი შესაბამისი მხარდაჭერით“, – აღნიშნულია კანონპროექტში.
კანონპროექტში ნათქვამია, რომ პენიტენციურ დაწესებულებას უფლება არ ექნება, შეაჩეროს ან შეამოწმოს ბრალდებულის/მსჯავრდებულის კორესპონდენცია, როდესაც ადრესატი ან ადრესანტია სპეციალური საგამოძიებო სამსახური.
