საქართველოს პარლამენტის ვიცე-სპიკერის არჩილ თალაკვაძის განცხადებით, მაშინ, როცა სახელმწიფო ზრუნავს მოქალაქეებზე, ოპოზიციის ნაწილი მხოლოდ და მხოლოდ პოლოტიკური საბოტაჟით არის დაკავებული.
არჩილ თალაკვაძემ აღნიშნული კოემნტარით უპასუხა კითხვას: „როგორ შეაფასებთ გიორგი ვაშაძის განცხადებას, რომ ერთი ტომარა ფქვილიდან 20 ლარი „ქართულ ოცნებას“ მისდის“.
როგორც არჩილ თალაკვაძე ამბობს, ასეთი განცხადება არასერიოზულია და პოლიტიკური უპასუხისმგებლობის მაგალითია.
„ეს არასერიოზული და პოლიტიკური უპასუხისმგებლობის მაგალითია. სინამდვილეში, როდესაც ჩვენ და სახელმწიფო ვზრუნავთ მოქალაქეებზე, რათა მათ უკეთესი ჯანდაცვა, სოციალური პირობები ჰქონდეთ, ვზრუნავთ, რომ ეროვნულ ვალუტასთან დაკავშირებით არსებობდეს სტაბილური სტატუსი, გატარებული იყოს ეფექტური ფისკალური და მონეტარული პოლოტიკა, ვცდილობთ, მაქსიმალურად დავიცვათ ქვეყანაში მშვიდობა და უსაფრთხოება, გავაუმჯობესოთ განათლების სისტემა, ასევე სოციალური, ეკონიმიკური ინფრასტრუქტურა, ამ დროს ეს ოპოზიცია მხოლოდ და მხოლოდ პოლოტიკური საბოტაჟით არის დაკავებული“, – განაცხადა არჩილ თალაკვაძემ.
ამასთან, როგორც არჩილ თალაკვაძე ამბობს, რადიკალური ოპოზიცია მოქალაქეებისთვის საჭირო ცვლილებების პროცესში არ იღებს მონაწილეობას. მისივე თქმით, სოციალურ საკითხებზე მათი პასუხები არის ქუჩის პროცესები, დესტაბილიზაცია და ე.წ. რიგგარეშე არჩევნები.
„მოქალაქეებისთვის საჭირო ცვლილებებში და კენჭისყრებში ესენი არ მონაწილეობენ. ევრორეკომენდაციების შემუშავების პროცესში არ მონაწილეობენ. როდესაც პანდემია იყო და მოქალაქეებს ყველაზე მეტად სჭირდებოდათ პარლამენტის სრულიად ფუნქციურ მდგომარეობაში ყოფნა, რვა თვე იყვნენ პოლიტიკური საბოტაჟის რეჟიმში. ნახეთ მათი საუბრები მედიაში, რაზე საუბრობს რადიკალური ოპოზიცია და რა გადაწყვეტილებებს სთავაზობს საზოგადოებას. სოციალურ საკითხებზე მათი პასუხები არის ქუჩის პროცესები, დესტაბილიზაცია და ე.წ. რიგგარეშე არჩევნები. კონსტიტუციაშიც არ აქვთ ჩახედული, სინამდვილეში, რა რიგგარეშე არჩევნებს ითხოვენ, მაშინ, როდესაც ეს საკონსტიტუციო ცვლილება მათთან შეთანხმებით იყო გატარებული და კარგად იციან, რომ რიგგარეშე არჩევნები არის აბსოლუტურად უსაფუძვლო მოთხოვნა ამ მომენტში. 2024 წლამდე არავითარი საპარლამენტო არჩევნები არ იქნება“, – აღნიშნა არჩილ თალაკვაძემ.
