აზერბაიჯანის პრეზიდენტი ილჰამ ალიევი სომხეთს სასაზღვრო ზონაში პროვოკაციებში ადანაშაულებს. „შანხაის თანამშრომლობის ორგანიზაციის“ სამიტზე ალიევმა თქვა, რომ აზერბაიჯანმა სომხეთს სამშვიდობო შეთანხმება წარუდგინა, თუმცა ერევანმა ამ ნაბიჯს სამხედრო პროვოკაციებით უპასუხა.
აზერბაიჯანის პრეზიდენტმა ასევე აღნიშნა, რომ ზოგიერთი წამყვანი საერთაშორისო ორგანიზაციის არაეფექტურობა შეშფოთების მიზეზია. აზერბაიჯანის პრეზიდენტი სამიტის ფარგლებში რუსეთის პრეზიდენტს, ვლადიმერ პუტინს შეხვდება.
„აზერბაიჯანმა სომხეთს წარუდგინა სამშვიდობო ხელშეკრულების ხუთი ძირითადი პრინციპი, რომელიც დაფუძნებულია სუვერენიტეტისა და ტერიტორიული მთლიანობის ორმხრივ აღიარებაზე. ჩვენ ახლა უნდა დავიწყოთ მუშაობა სამშვიდობო შეთანხმების პროექტზე წინაპირობებისა და ხელოვნური შეფერხებების გარეშე. სამწუხაროდ, წელს 13 სექტემბერს სომხეთმა აზერბაიჯანის სახელმწიფო საზღვრის რეგიონში მასშტაბური სამხედრო პროვოკაცია განახორციელა. აზერბაიჯანის შეიარაღებულმა ძალებმა მტკიცედ აღკვეთეს ეს პროვოკაცია. ეს პროვოკაცია უზარმაზარი დარტყმაა ორ ქვეყანას შორის ურთიერთობების ნორმალიზების პროცესზე. ამაზე მთელი პასუხისმგებლობა სომხეთის სამხედრო-პოლიტიკურ ხელმძღვანელობას ეკისრება“ – თქვა ილჰამ ალიევმა.
