პაატა მანჯგალაძე - პარტიაში არ გვიმსჯელია პარლამენტის თავმჯდომარესთან სახალხო დამცველის შესახებ კონსულტაციებზე, თუ პროცესი ფარსია და მხარი არ დავუჭირეთ, არც ამ ფარსში უნდა მივიღოთ მონაწილეობა

პარტიაში არ გვიმსჯელია პარლამენტის თავმჯდომარესთან სახალხო დამცველის შესახებ კონსულტაციებზე, ჩემი პოზიციაა, რომ თუ პროცესი არის ფარსი და მხარი არ დავუჭირეთ, არც ამ ფარსში არ უნდა მივიღოთ მონაწილეობა, – ამის შესახებ „სტრატეგია აღმაშენებლის“ ლიდერმა პაატა მანჯგალაძემ განაცხადა.

მისივე თქმით, პარტიაში სახალხო დამცველთან დაკავშირებით პოზიცია არ შეუცვლიათ.

„ნამდვილი ინკლუზიური პროცესი იყო ის პრაქტიკა, რითაც მოხდა უჩა ნანუაშვილის არჩევა და შემდეგ ნინო ლომჯარიას დამტკიცება. როცა 100-ზე მეტი გავლენიანი არასამთავრობო ორგანიზაცია იყო ჩართული შერჩევის პროცესში და არც ოპოზიციას, არც ხელისუფლებას არანაირი ზეგავლენა არ შეეძლო პროცესზე. ახლანდელი პროცესი ვითომ ზეინკლუზიურია, როგორც „ქართული ოცნება“ ამბობს, სინამდვილეში არის ის, რომ პაპუაშვილმა უნდა შეარჩიოს ექვსი თუ შვიდი არასამთავრობო ორგანიზაცია, რომელიც მისთვის სასურველია. ჩვენ ამ კანონს მხარი არ დავუჭირეთ, ამ პროცესში მონაწილეობას არ ვიღებთ. ეს არის დემოკრატიის, ინკლუზიურობისა და გამჭვირვალობის საფარქვეშ კონტროლი კანდიდატის შერჩევის პროცესში; ხელისუფლების ჩარევის მცდელობა, რომ დემოკრატიის სახელით მისთვის სასურველი კანდიდატი გაიყვანოს სახალხო დამცველად“, – განაცხადა მანჯგალაძემ.

ამასთან, როგორც მანჯგალაძემ განაცხადა, პარტიაში არ უმსჯელიათ პარლამენტის თავმჯდომარის მიერ სახალხო დამცველის კანდიდატურის წარდგენის უფლების მქონე სუბიექტებთან, საპარლამენტო ფრაქციებთან და პოლიტიკურ ჯგუფებთან კონსულტაციებთან დაკავშირებით.

„ამ საკითხზე „სტრატეგია აღმაშენებელს“ არ გვიმსჯელია. ამას ერთობლივად გადავწყვეტთ, მაგრამ ჩემი პოზიციაა, რომ თუ პროცესი არის ფარსი და მხარი არ დავუჭირეთ, არც ამ ფარსში არ უნდა მივიღოთ მონაწილეობა“, – განაცხადა პაატა მანჯგალაძემ.