დამოუკიდებელი დეპუტატი თამარ კორძაია სახალხო დამცველის არჩევის წესზე „ქართული ოცნების“ მიერ მომზადებული კანონპროექტის მესამე მოსმენით მხარდაჭერასაც აპირებს.
თამარ კორძაიამ ცვლილებებს ორი მოსმენით დაუჭირა მხარი, ამის მიზეზად დაასახელა ის, რომ მის მიერ გამოთქმული შენიშვნები გაზიარებულია.
დეპუტატი გამოეხმაურა იმასაც, რატომ არ დაუჭირეს მხარი ცვლილებებს „ნაციონალურმა მოძრაობამ“, „ლელომ“ და „სტრატეგია აღმაშენებელმა“.
კორძაიას მიაჩნია, რომ ცვლილებებთან დაკავშირებით საპარლამენტო გამოსვლისას შალვა პაპუაშვილის განცხადება ცოტა პროვოკაციული იყო.
„პარლამენტის თავმჯდომარის ბრძანებასთან დაკავშირებით დამატებით ძალიან ბევრი სამუშაო იქნება, რომ შეფასებასთან დაკავშირებით შენიშვნები არ დარჩეს. მგონია, რომ შემფასებელი ჯგუფის შეფასების წესზე ძალიან დეტალურად გვაქვს სამუშაო, რადგან კანდიდატებს არ უნდა დარჩეთ შთაბეჭდილება, რომ რაღაც არ არის გათვალისწინებული. შესაბამისად, სამუშაო უნდა გაგრძელდეს შემფასებელთა ჯგუფთან მიმართებით და შეფასების წესთან დაკავშირებით. ჩემი, როგორც ერთი დეპუტატის შეფასებით, შალვა პაპუაშვილის განცხადება ცოტა პროვოკაციული იყო და გამაღიზიანებელი იქნებოდა მაშინ, როცა შეთანხმებები და ოპოზიციის მხრიდან მხარდაჭერა დიდი მიღწევაა, რომელსაც უნდა გაუფრთხილდეს „ქართული ოცნება“ და პარლამენტის თავმჯდომარე. არანაირი გარანტია არ მქონდა, რომ რეგლამენტშიც გაითვალისწინებდნენ ჩემს შენიშვნებს, მაგრამ ვინაიდან ჩაწერეს, რომ კონსულტაციებით მოხდება ეს ყველაფერი, მაქვს მოლოდინი, რომ ეს კონსულტაციები იქნება“, – განაცხადა კორძაიამ.
კანონპროექტი მესამე მოსმენით დღეს საპროცედურო კომიტეტის სხდომაზე განიხილეს. მისი მესამე მოსმენით დამტკიცება დღეს პლენარულ სხდომაზე იგეგმება. ცვლილებებით იცვლება სახალხო დამცველის არჩევის პროცედურა.
კანონპროექტს პირველი მოსმენით მხარი დაუჭირეს „ნაციონალურმა მოძრაობამ“ და „ლელომ“, თუმცა მათ მეორეს მოსმენისას ცვლილებებს ხმა არ მისცეს.
