ოპოზიციური პარტიების ნაწილი ცდილობს, რამენაირად გაამართლოს საკუთარი ძალიან მძიმე შეცდომა, – ამის შესახებ საქართველოს პირველ არხს პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განუცხადა.
როგორც მიხეილ სარჯველაძემ აღნიშნა, ძალიან კარგად ხვდებიან, ამ კამათში მათ მიერ დაშვებულ მწარე შეცდომას და ახლა ცდილობენ, რადაც არ უნდა დაუჯდეთ, ვითარება სხვაგვარად წარმოაჩინონ.
„ევროპარლამენტარებმა დეპოლარიზაცია გვთხოვეს და სახეზეა მათი დემარში, რადგან მათ გადაწყვეტილება მიიღეს, რომ ერთობლივ მუშაობას არ შემოუერთდნენ და ამისთვის ბევრი მიზეზი მოიგონეს, რომელთაგან არც ერთი არ იყო ვარგისი საიმისოდ, რომ მათი გადაწყვეტილება გამართლებულიყო, რომ დესტრუქციული როლი შეესრულებინათ. მეჩვენება, რომ ძალიან კარგად ხვდებიან, ამ კამათში მათ მიერ დაშვებულ მწარე შეცდომას და ახლა ცდილობენ, რადაც არ უნდა დაუჯდეთ, ვითარება სხვაგვარად წარმოაჩინონ. სამწუხაროდ, ამ მიზნის მისაღწევად კადრულობენ ისეთ რამეს, რაც სიმართლეს არ შეესაბამება – შვებულება არც დაგეგმილი გვქონია და თავად სანამ მუშაობას დაიწყებდნენ, მანამდე გეგმა გვქონდა უკვე დადებული მუშაობის, რომლის შესრულება დავიწყეთ. ამ გეგმას ვერ ეწევიან და შთაბეჭდილებას ქმნიან, რომ ისინი ვინმეზე მეტს მუშაობენ, შეჯიბრი არ გვაქვს გამოცხადებული, ეს არ არის ოლიმპიური თამაშები, სადაც ვინმემ რაღაც აქტივობა უნდა აჩვენოს. ეს პროცესი ოლიმპიურ თამაშებს იმ თვალსაზრისით ჰგავს, რომ მთავარი მონაწილეობაა და არა შედეგები, რასაც თავისი პარტიული ინტერესებიდან გამომდინარე ფიქრობენ. რაც უფრო მალე დაუბრუნდებიან ნორმალურ კალაპოტს, მით უკეთესია. მათი მხრიდან შეცდომის აღიარება საშიში არ არის“, – განახცადა სარჯველაძემ.
