აშშ-ის პრეზიდენტის, დონალდ ტრამპის განცხადებით, ირანის წინააღმდეგ სამხედრო მოქმედებების განახლება ნაკლებად სავარაუდოა, თუ თეირანთან ბირთვულ პროგრამაზე მოლაპარაკებები წარმატებით დასრულდება და ჰორმუზის სრუტე გაიხსნება. ამის შესახებ ტრამპმა CNN-თან ინტერვიუში განაცხადა.
„ეს იმაზეა დამოკიდებული, მოაწერენ თუ არა ხელს ძალიან მყარ შეთანხმებას. ძალიან ნაკლებად სავარაუდოა, რომ ეს საჭირო გახდეს. ის ჩამოშლის პირას მყოფი ქვეყანაა. ახლახან გახდა ცნობილი, რომ წელს ინფლაციამ 301% შეადგინა“, – აღნიშნა ტრამპმა.
მისი თქმით, აშშ-ის სამხედრო ძალები რეგიონში სრულ მზადყოფნაში რჩებიან და საჭიროების შემთხვევაში ახალი დარტყმების განხორციელება შეუძლიათ.
„ამისთვის მზად ვართ. აქ სამი ავიამზიდი მყავს. კიდევ ერთი ახლახან ჩამოვიდა. სამივე სრულ საბრძოლო მზადყოფნაშია“, – განაცხადა აშშ-ის პრეზიდენტმა.
ტრამპის მტკიცებით, სამხედრო მოქმედებების განახლების შემთხვევაში, შეერთებულ შტატებს ირანში უკვე განსაზღვრული აქვს ინფრასტრუქტურული სამიზნეები, მათ შორის ელექტროსადგურები და ხიდები.
„38 ხიდია, რომელთა განადგურებაც, ფაქტობრივად, ერთ საათში შეგვიძლია. ყველა მათგანი განადგურდება. ამის გაკეთება არ მსურს, რადგან, არსებითად, მათ აღდგენას 10 წელი დასჭირდება“, – განაცხადა მან.
აშშ-ის პრეზიდენტის მტკიცებით, ირანის საჰაერო თავდაცვის სისტემები განადგურებულია, ქვეყანას კი სარაკეტო პოტენციალის დაახლოებით 10% და დრონების წარმოების შესაძლებლობების 15% აქვს შენარჩუნებული.
„მათი ყველა საზენიტო სისტემა განადგურებულია“, – აღნიშნა ტრამპმა და დასძინა, რომ ირანის სამხედრო ქარხნების დიდი ნაწილიც განადგურებულია.
მიუხედავად სამხედრო მზადყოფნისა, ტრამპი მიიჩნევს, რომ ახალი შეტევის საჭიროება არ დადგება, რადგან თეირანი შეთანხმების მიღწევით არის დაინტერესებული.
„დიდი ალბათობით, ამის საჭიროება არ იქნება. მათ ძალიან სურთ შეთანხმების მიღწევა“, – განაცხადა აშშ-ის პრეზიდენტმა.
