ეგრეთ წოდებულმა საარჩევნო კოლეგიამ ეგრეთ წოდებულ პრეზიდენტად მიხეილ ყაველაშვილი აირჩია
14.12.2024 ნახვები: 623
300-წევრიანმა კომისიამ საქართველოს ე.წ. პრეზიდენტად მიხეილ ყაველაშვილი აირჩია.
ცენტრალურმა საარჩევნო კომისიამ საჯარო სხდომაზე ხმები ცოტა ხნის წინ შეაჯამა, რის შემდეგაც პლენარული სხდომის დარბაზში შეკრებილ საარჩევნო კომისიის წევრებს ცესკოს თავმჯდომარემ არჩევნების შედეგები გააცნო.
დარბაზში იმყოფება კოლეგიის მიერ ე.წ. პრეზიდენტად ახლახან არჩეული მიხეილ ყაველაშვილიც.
ყაველაშვილის სასარგებლოდ ხმა 224-მა ხმოსანმა მისცა. მას მხარი არ დაუჭირა აფხაზეთის უმაღლესი საბჭოს წევრმა, ადა მარშანიამ, რომელმაც თქვა, რომ ყაველაშვილის კანდიდატურა არ მოსწონს.
პროცესში მონაწილეობა არ მიუღია ოპოზიციას.
ცენტრალური საარჩევნო კომისიის თავმჯდომარის თქმით, კენჭისყრაში მონაწილეობა მიიღო 225-მა წევრმა, საიდანაც ბათილია 1 ბიულეტენი.
პროცედურა პარლამენტის პლენარულ სხდომათა დარბაზში წარიმართა.
კენჭისყრა ღია წესით ჩატარდა. ხმა ჯერ საქართველოს ე.წ. პარლამენტის წევრებმა, შემდეგ კი კოლეგიაში მყოფი სხვა სახელმწიფო ორგანოების წარმომადგენლებმა, ანბანური თანმიმდევრობით მისცეს.
შედეგების გამოცხადებას კოლეგიის წევრები ტაშით შეხვდნენ.
ცესკო-ს თავმჯდომარემ შემაჯამებელი ოქმი ე.წ. პარლამენტის თავმჯდომარე, შალვა პაპუაშვილს გადასცა და საარჩევნო პროცესი დასრულებულად გამოაცხადა.
მიხეილ ყაველაშვილი ე.წ. პრეზიდენტობის ერთადერთი კანდიდატი იყო.
