ნიუ-იორკში, ეპისკოპალურ ანგლიკანურ ეკლესიაში - All Saints Episcopal Church- წირვა ქართულ ენაზე ჩატარდა.
წირვას ქართული ემიგრაციის ასამდე წარმომადგენელი ესწრებოდა. ეს პირველი შემთხვევაა, როდესაც აშშ-ში, ეპისკოპალურ ანგლიკანურ ეკლესიაში, წირვა ქართულ ენაზე ჩატარდა.
ეკლესიის წინამძღვარი, მამა სტივენი, წირვას ქართულად უძღვებოდა. წირვაზე მსახურებდა დავით მიხეილ შუბლაძე და სტიქაროსნები - გიორგი სტეფნაძე, თინა მახარაძე, არჩილ ფერი და გიორგი ნათელაშვილი.
წირვაზე გალობაც ქართულ ენაზე მიმდინარეობდა.
წირვის შემდეგ გაიმართა ქართული მრავალხმიანობის კონცერტი და საზეიმო მიღება ქართული სუფრით.
როგორც „ნეიშენ ჯორჯიას“ ქართული სამრევლოს წარმომადგენლებმა განუცხადეს, წირვის ქართულ ენაზე ჩატარების ინიციატივა ეკუთვნის პროტესტანტულ-ანგლიკანური ეკლესიის ქართველ მრევლის და კერძოდ, დავით მიხეილ შუბლაძე. მხარდამჭერია ბრუკლინში ეპისკოპალური ეკლესია - წმინდა ეკლესია (All Saints Episcopal Church) და მისი წინამძღვარი მამა სტივენი.
მამა სტივენს განსაკუთრებული დამოკიდებულება აქვს საქართველოსა და ქართველი ხალხის მიმართ. მცირედად ფლობს ქართულ ენას და საქართველოშიც არის ნამყოფი.
მამა სტივენი დიდი ენთუზიაზმით უთმობს საეკლესიო სივრცეს ქართველ ემიგრანტებს.
საეკლესიო სივრცეს ქართული ემიგრაცია თვეში ერთხელ იყენებს შეკრებებისთვის და ქართველი ემიგრანტების წინაშე მდგარ საკითხებზე და საჭიროებებზე სამსჯელოდ.
შეკრებების შემდეგ იმართება ქართული კულტურული და კულინარიული ღონისძიებები.
