ადვოკატი - ბადრი ესებუა ბრალს არ აღიარებს და თავს დამნაშავედ არ მიიჩნევს
08.02.2023 ნახვები: 564
ბადრი ესებუა ბრალს არ აღიარებს და თავს დამნაშავედ არ მიიჩნევს, – ამის შესახებ ჟურნალისტებს დაკავებულის ადვოკატმა, იოსებ ჯანაშიამ განუცხადა.
იოსებ ჯანაშიას თქმით, ესებუა ბანკში საერთოდ არ იმყოფებოდა.
„ის თავს დამნაშავედ არ ცნობს. რაც შეეხება, თუ სად იყო ამ წლების განმავლობაში, მისი ზოგადი პასუხი იყო, რომ გრძნობდა მისი სიცოცხლის განადგურების საფრთხეს და შესაბამისად, თავს არიდებდა გამოძიების ეტაპზე სამართალდამცველებთან გამოცხადებას“, – განაცხადა ბადრი ესებუას ადვოკატმა, იოსებ ჯანაშიამ.
„საქართველოს ბანკის“ ფილიალის დაყაჩაღებაში ბრალდებული ბადრი ესებუას დაკავების შესახებ ინფორმაცია დღეს დილით გავრცელდა. ესებუას დაკავების შესახებ ოფიციალური ინფორმაცია და ვიდეომასალა უკვე გაავრცელა შინაგან საქმეთა სამინისტრომ. ესებუა ქუთაისის N2 სასჯელაღსრულების დაწესებულებაში გადაიყვანეს. პირველი არხის ინფორმაციით, ბადრი ესებუა სოფელ ჯიხაშკარში დააკავეს.
ზუგდიდში, „საქართველოს ბანკის“ ფილიალზე თავდასხმა 2020 წლის 21 ოქტომბერს მოხდა. შსს-ს ინფორმაციით, ყაჩაღური თავდასხმა ბადრი ესებუამ განახორციელა. თავდამსხმელს რამდენიმე საათის განმავლობაში მძევლად ჰყავდა აყვანილი 43 ადამიანი. გამოძიების ინფორმაციით, თავდასხმელმა ბანკიდან ნახევარი მილიონი დოლარის წაღება შეძლო.
საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით აღიძრა, რაც ტერორისტულ აქტს, ტერორისტული მიზნით მძევლად ხელში ჩაგდებას და ცეცხლსასროლი იარაღის უკანონოდ შეძენა-შენახვა-ტარებას გულისხმობს.
