საფრანგეთის პრეზიდენტის, ემანუელ მაკრონის ინიციატივა ევროპული პოლიტიკური გაერთიანების შექმნის შესახებ არ წარმოადგენს ევროკავშირში წევრობის ან გაწევრიანების პროცესის ალტერნატივას. ამის შესახებ ნათქვამია საფრანგეთის საგარეო საქმეთა სამინისტროს მიერ გამოქვეყნებულ განცხადებაში.
უწყებას მიმართეს კითხვით, ხომ არ შიშობს საფრანგეთი, რომ კიევს შესაძლოა, არასწორი სიგნალი გაუგზავნოს, როდესაც საუბრობს, რომ უკრაინის ევროკავშირში შესაძლო გაწევრიანებას 15-20 წელი დასჭირდება.
„ჩვენ მივესალმებით ევროკავშირში გაწევრიანების შესახებ უკრაინის განაცხადს. მას ახლა სწავლობს ევროკომისია და ის განხილული იქნება შემდეგ ივნისში ევროპული საბჭოს სახელმწიფო და მთავრობების მეთაურების მიერ. როგორც რესპუბლიკის პრეზიდენტმა 9 მაისს და ევროპის საკითხთა მინისტრმა გუშინ განაცხადეს, უკრაინა არის ევროპული ოჯახის ნაწილი. რესპუბლიკის პრეზიდენტის მიერ ჩამოყალიბებული ევროპული პოლიტიკური გაერთიანების პროექტი არ წარმოადგენს არც წევრობის ალტერნატივას და არც გაწევრიანების პროცესის ალტერნატივას. პირიქით, ის მიმართულია ჩვენს სამეზობლოში ყველა ევროპულ ქვეყანასთან ურთიერთობების, რაც შეიძლება სწრაფად გაძლიერებისკენ, ხოლო მათთვის, ვინც არიან კანდიდატები, ჩვენი მხარდაჭერის გაძლიერებისკენ ყველა სფეროში მათი გაწევრიანების მიზნით“, – ნათქვამია საფრანგეთის საგარეო საქმეთა სამინისტროს განცხადებაში.
შეგახსენებთ, 22 მაისს საფრანგეთის ევროპულ საქმეთა მინისტრმა, კლემენტ ბონმა ფრანგულ მედიასთან განაცხადა, რომ უკრაინის ევროკავშირში გაწევრიანებას სავარაუდოდ 15-20 წელი დასჭირდება. მანამდე საფრანგეთის პრეზიდენტმა ემანუელ მაკრონმა განაცხადა, რომ ევროკავშირში უკრაინის გაწევრიანების პროცესს შესაძლოა, ათობით წელი დასჭირდეს.
