კეთილი ინებოს საქართველოს პრეზიდენტმა და მიიღოს გადაწყვეტილება, რათა ჩავიდეს უკრაინაში. ეს იქნება ამ ვითარებაში ოდნავი გამოსავალი, – ამის შესახებ „ნაციონალური მოძრაობის“ წევრმა, რომან გოცირიძემ განაცხადა.
გოცირიძემ აღნიშნულის შესახებ მას შემდეგ განაცხადა, რაც ჟურნალისტებმა სთხოვეს, შეეფასებინა უკრაინის უმაღლესი რადას თავმჯდომარის მიერ ბუჩაში მიწვევაზე შალვა პაპუაშვილის განცხადება იმის შესახებ, რომ „საქართველოში მეორე ფრონტის გახსნის მოთხოვნის, დიპლომატიური დემარშების, კონტრაბანდაში უსაფუძვლო დადანაშაულების განუმარტებლობის ფონზე, უკრაინაში ოფიციალური მიწვევა არასათანადოდ ჩანს“.
გოცირიძის თქმით, საჭიროა, რომ პრეზიდენტის მხრიდან ეს ნაბიჯი დროულად გადაიდგას.
„როდესაც ისტორიაში დღევანდელი პერიოდი დახასიათდება, ჩვენი ქვეყნის ისტორიის სახელმძღვანელოში ჩაიწერება უკრაინის პრეზიდენტის ზელენსკის სიტყვები, რომ ქართველი ხალხი სჯობია მის მთავრობას. ამაზე საუკეთესო დახასიათება ამ ეპოქის არავის მოუცია. ძალიან სამწუხარო და სამარცხვინოა ის ფაქტი, რაც ახლა ხდება. ყოველი ახალი განცხადება თუ ნაბიჯი იწვევს ქვეყნის რეპუტაციის კიდევ უფრო შელახვას, გვიკარგავს საერთაშორისო მეგობრების, ჩვენი პარტნიორების მხარდაჭერას და დახმარებას. ეს შავი ლაქა, რომელიც საქართველოს ხელისუფლებამ, მათ შორის საქართველოს პარლამენტმა და მისმა ხელმძღვანელობამ წაუსვა ჩვენი ქვეყნის რუკაზე, ამის მცირეოდენი ჩამორეცხვის შანსი ჯერ კიდევ არსებობს. კეთილი ინებოს საქართველოს პრეზიდენტმა და მიიღოს გადაწყვეტილება, რათა ჩავიდეს უკრაინაში. ეს იქნება ამ ვითარებაში ოდნავი გამოსავალი. თანაც ამ ნაბიჯის გადადგმა საჭიროა დროულად, თორემ კიევში გამარჯვების მიტინგზე მერე ზელენსკის გვერდით ფოტოს გადაღებისთვის რიგში დგომა მოუწევს“, – განაცხადა რომან გოცირიძემ.
