ჩინეთი თუ მხარს არ დაუჭერს რუსეთის წინააღმდეგ სანქციებს, სულ მცირე ნუ ჩაერევა ჩვენს სანქციებში, - ამის შესახებ ევროკომისიის პრეზიდენტმა ურსულა ფონ დერ ლაიენმა ევროკავშირ-ჩინეთის ონლაინსამიტის შემდეგ გამართულ პრესკონფერენციაზე განაცხადა.
მისი თქმით, ომის გახანგრძლივება და მსოფლიო ეკონომიკისთვის ზიანის მიყენება არავის ინტერესებში არ შედის, განსაკუთრებით ჩინეთის ინტერესებში.
„ჩინეთთან გვქონდა საკმაოდ ღია და გულწრფელი აზრთა გაცვლა როგორც პრეზიდენტ სი ძინპინთან, ასევე პრემიერ ლი ტეციანთან. აღინიშნა, რომ ეს ვითარება განმსაზღვრელი მომენტია არა მხოლოდ რეგიონისთვის, არამედ მთელი მსოფლიოსთვის. ჩვენ მხარს ვუჭერთ უკრაინას და მის ხალხს, რადგან ისინი გაუმართლებელი აგრესიის წინაშე არიან. ეს ომი არის იმ ძირითადი პრინციპებისა და წესების დარღვევა, რომელიც ჩაკერებულია გაერო-ს წესდებაში. გაერო-ს წევრთა უმრავლესობა დგას ერთად უკრაინის წინააღმდეგ რუსეთის აგრესიის დაგმობის საკითხში.
ჩინეთს, როგორც უშიშროების საბჭოს მუდმივ წევრს, აქვს განსაკუთრებული პასუხიმგებლობა. ჩვენს საერთაშორისო პარტნიორებთან ერთად, რუსეთის წინააღმდეგ დავაწესეთ მკაცრი სანქციები, რომლებიც ეფექტურია და რომელსაც 40-ზე მეტი ქვეყანა შეუერთდა. ჩვენ მკაფიოდ აღვნიშნეთ, რომ თუ ჩინეთი მხარს არ დაუჭერს, სულ მცირე ნუ ჩაერევა ჩვენს სანქციებში. ევროკავშირის არც ერთი მოქალაქე არ მიიღებს რუსეთისთვის ამ ომის წარმოების შესაძლებლობისადმი მხარდაჭერას. მეტიც, ეს იქნება უზარმაზარი ზიანი ჩინეთის რეპუტაციისთვის ევროპაში. რეპუტაციული რისკები აიძულებს სხვადასხვა კომპანიას, გამოვიდნენ რუსეთის ბაზრიდან. ბიზნესსექტორი აკვირდება ძალიან ყურადღებით და აფასებს, როგორ იქცევიან სხვა ქვეყნები, ეს არის ნდობის ფაქტორი და გადაწყვეტილებები ხანგრძლივ ინვესტიციებთან დაკავშირებით.
მსურს შეგახსენოთ, რომ ყოველდღიურად ევროკავშირსა და ჩინეთს შორის ვაჭრობა 2 მილიარდ ევროს აღემატება მაშინ, როცა რუსეთთან ეს მაჩვენებელი ჩინეთს 300 მილიონის ფარგლებში აქვს. ომის გახანგრძლივება და მსოფლიო ეკონომიკისთვის ზიანის მიყენება არავის ინტერესებში არ შედის, განსაკუთრებით ჩინეთის ინტერესებში", - განაცხადა ურსულა ფონ დერ ლაიენმა.
